Qochqinlar vatanga qaytmoqda, nima uchun?


Andijon voqealaridan so’ng chetga, shu jumladan AQShga kelgan o’zbekistonlik qochqinlardan bir bo’lagi vataniga ixtiyoriy ravishda qaytgan. Bu 12 nafar qochqinga nisbatan jinoiy ish ochilmasligi haqida ma`lumot tarqatilmoqda. Ularning Andijonda ekanligi haqida ma`lumotlar bor.

Huquq himoyachilariga ko`ra qochqinlarni ortga qaytarishga majbur qilgan narsa bu Andijonda ularning yosh farzandlari qolganligi bilan bog`liq bo`lishi mumkin. Bu haqda “Ezgulik” inson huquqlari jamiyatining Andijondagi vakillaridan biri Shokirjon Mo`minov, “Ba`zida endi bor-e nima bo`lsam bo`ldim, bir marta ularni ko`rib o`lsam ham mayli degan fikrga borishi mumkinda ular",- deydi.

"Bu yerdan ketganlarni oila a`zolari qolgan. Masalan, men ikkitasini aniq bilaman, ularni to`rttadan bola-chaqalari qolgan. Yosh bolalari hammasi qolgan. Ayniqsa farzand nihoyatda ko`zdan o'tib ketadi ”, - deydi Shokirjon Mo`minov.

Shokirjon Mo`minovga ko`ra hozircha qochqinlarga nisbatan biron bosim o`tkazilgani haqidagi ma`lumot yo`q, lekin kelajakda ulardan Andijon fojialarini hukumat xohlagan tarzda tasvirlashda targ`ibot vositasi sifatida foydalanilishi ehtimolga yaqin.

“Ularni “obrabotka” qilib sayratma qilishlari mumkin. Targ`ibot yo`lida ularni ishlatishlari turgan gap”, deb hisoblaydi andijonlik huquq himoyachisi.

Rasmiy ma`lumotlarga ko`ra AQShdan O`zbekistonga qaytarilgan 12 nafar qochqinning Andijondagi terrorchilik hodisalariga aloqasi yoq. Bu haqda press-uz.info axborot agentligi O`zbekiston Ichki ishlar vazirligidagi manbaga asoslanib xabar tarqatmoqda. Bu xabarga ko`ra qochqinlar O`zbekistondan aldov yo`li bilan olib ketilgan.

BMT tomonidan qochqinlik maqomiga ega va AQShdan boshpana berilgan 12 fuqaro Andijon fojialaridan keyin yuzlab qochqinlar qatorida mamalakatni tark etgan edi.

XS
SM
MD
LG