Umida Niyozova yetti yilga ozodlikdan mahrum etildi


Toshkentda huquq himoyachisi Umida Niyozova yetti yilga ozodlikdan mahrum etilgan. Huquq faollari hukmni qoralamoqda va O’zbekistonda ularga nisbatan tazyiq kuchayayotgani haqida ogohlantirmoqda.

Umida Niyozova ustidan boshlangan sud jarayoni juda tez o`tdi. Dushanba kuni boshlangan jarayonda guvohlar ko`rsatmasi tinglangan bo`lsa, suddning ikkinchi kuni Umidaga so`nggi so`z berildi va xuddi shu kuni kechga yaqin yetti yil qamoq jazosini belgilash haqida hukm o`qildi.

Sud jarayonida faqat Umidaning opasi va Human Rights Watch vakili Andrea Berg ishtirok etishga muvaffaq bo`lgan.

Andre Berg fikriga ko`ra, Umida o`ziga berilgan so`nggi so`zda chegarani noqonuniy kesib o`tishdan tashqari, boshqa ayblovlarning barchasini rad etgan. O`zbekistonda fuqarolik jamiyatini qurish tanqidiy fikrlarsiz amalga oshmasligini, demokratik islohotlar uchun so`z va fikr erkinligi muhumligi aytgan. Shuningdek, suddan uning voyaga yetmagan farzandi borligini inobatga olishni so`ragan.

“Sud jarayoni xalqaro huquq me’yorlariga amal qilmagan holda o`tdi. Xalqaro kuzatuvchilarning sudda ishtirok etmasligi uchun barcha harakatlar qilindi. Sud adolatsiz qaror chiqardi. Biz Umida Niyozovaning zudlik bilan qamoqdan chiqarilishini talab qilishda davom etamiz deydi,” - Andre Berg.

Umida aksilkonstitutsiyaviy materiallarni saqlash, jamoat xavfsizligiga tahdid soluvchi materialarni tarqatganlikda ayblanmoqda.

Aksilkonstitutsiyaviy material sifatida Umidaning musodara qilingan kompyuteridan topilgan, Human Rights Watchning Andijon fojealari haqida tayyorlagan “Qo`rg`oshinli yomg`ir” deb nomlangan hisoboti keltirilgan.

Andre Berg ta’kidlashicha, bu hisobot O`zbekistondagi rasmiy idoralarga ham tadqim etilgan. Sudda ekspertlarning bu hisobotni aksilkonstitutsiyaviy deb xulosa berishining o`zi g`alati.

Huquq himoyachisi Surat Ikromov ta’biricha, Umida Niyozova jarayoni kabi tez o`tgan ikki kunlik sud tajribada uchramagan.

“Umida Niyozova yuzasidan shuncha bayonotlar bo`lishiga qaramasdan, diplomatik korpus vakillari, xalqaro kuzatuvchilar va jurnalistlardan birortasi jarayonga kiritilmadi, adolatsiz va o`ta qattiq hukm chiqarildi”, - deydi Surat Ikromov.

Sud jarayonida qatnashish istagida kelgan kuzatuvchilar fikricha, Umidaga nisbatan qo`yilgan ayblarning, chegarani noqonuniy buzub o`tish aybidan tashqari, birortasi isbotlanmagan. Hukm adolatsiz, zo`ravonlik tufayli chiqarilgan.

Umida Niyozova hukmini qayta ko’rib chiqish uchun sudga apellyatsiya yo’llanishi kutilmoqda.

XS
SM
MD
LG