Breaking News

Ayrim huquq faollari qamoqdan ozod etilmoqda, ayrimlari bosim ostida


Dekabr oyida hibsga olingan shoir Yusuf Juma qamoq va tergov jarayoni yuzasidan rasmiy idoralarga shikoyat yozgan, lekin qog'oz uning advokati Ruhiddin Komilovdan tortib olingan.

Shoir bilan uchrashishga muvaffaq bo`lgan advokat Komilovning aytishicha, uning o`zi ham Buxoro viloyati tergov boshqarmasi xodimlari tomonidan ma`lum muddat hibsda ushlab turilgan.

“Yusuf Jumaga bo`layotgan noqununiy harakatlar, tazyiqlar haqidagi ariza bitgunicha ular tepamizda turishdi. Keyin men nega bunaqa qilayapsizlar deb so`radim. Chiqib ketayotganimda “yo`q, chiqmaysiz”, deyishdi. Haqqinglar yo`q desam ham ish hujjatlarimni olib qo`yishdi. Yarim soatlar ushlab turib keyin qo`yib yuborishdi. Prokuraturaga shikoyat qildim, chora ko`ramiz deyishgan”, - deydi advokat Ruhiddin Komilov.

Bundan avval Buxoroda diniy e`tiqod yuzasidan o`tayotgan sud jarayonida qatnashish uchun yo`lga chiqqan huquq himoyachisi Yelena Urlayeva vokzalda noma'lum ayollar tomonidan kaltaklab ketilgan edi.

Buxoroda diniy ekstremistik tashkilotga a`zolikda ayblanayotgan 14 nafar fuqaro ustidan sud ishi davom etmoqda.

Huquq himoyachilarining so’zlariga ko`ra, yopiq tarzda o`tayotgan sud jarayoni ayblanuvchilarning dalil-ko`rsatmalarini mutlaqo e`tiborga olmayapti.

So`nggi haftada ozodlikka chiqqan huquq himoyachilari orasida Saidjahon Zaynobiddinov ham bor. Zaynobiddinov bevosita Andijon voqealari yuzasidan ayblanib, qamalganlar orasida birinchi bo`lib ozodlikka chiqqan huquq himoyachisidir.

“Shtabga chaqirtirib, ozodlikka chiqasizmi-yo`qmi deb so`rashdi. Chiqaman dedim, blanklarga imzo chekib berdim. Keyin muassasa ofitserining o`zi uyimgacha kuzatib qo`ydi. Amnistiyaga ko`ra, mutlaqo ozod etildim, boshqa hech qanaqa nazorat bo`lishi kerak emas”, - deydi Zaynobiddinov.

Kuzatuvchilar fikricha, O`zbekiston hukumati shu yo’l orqali G`arb bilan aloqani tiklashga harakat qilmoqda.

Yaqinda O`zbekiston huquq himoyachilari alyansi qamoqdagi siyosiy mahbuslarning barchasini ozod etilishini talab qilib O`zbekiston Bosh prokuraturasi oldida piket o`tkazdi.

Ozod etilayotgan siyosiy mahbuslardan qamoqda o`tirganlari ko`proq ekani aytiladi.

Huquq himoyachilari qamoqdagi siyosiy mahbuslar bilan bog`lanishga, ularga amnistiya qo`llanishi ehtimolini o`rganishga harakat qilgan, biroq bu harakatlar samarasiz tugagan.

XS
SM
MD
LG