Bryusselda NATO tashqi ishlar vazirlari uchrashmoqda


NATOga a'zo davlatlar tashqi ishlar vazirlari Rossiya bilan oliy darajadagi muloqotni jonlantirishga kelishib olgan. Bryusselda o'tayotgan majlisda AQSh Davlat kotibi Xillari Klinton mart oxirida Afg'oniston bo'yicha maxsus xalqaro anjuman o'tkazish taklifini kiritgan.

NATOning Bryusseldagi bosh qarorgohidan muxbirimiz Sonya Peysning xabar qilishicha, Rossiya bilan munosabatlarni tiklashga qaratilgan qizg'in munozaralar yopiq eshiklar ortida o'tgan.

O'tgan yili Rossiya Gruziyaga hujum qilgandan beri NATO-Rossiya Kengashi faoliyat yuritmagan. Kreml bilan dasturlarni tiklashga alyansning Sharqiy Yevropadagi a'zolari qarshi chiqqan. Ular nazarida bu bilan NATO Rossiya oldida o'zini kuchsiz qilib ko'rsatmoqda.

Biroq, deydi Bosh kotib Yaap de Xup Sxeffer, uzoq tortishuvlardan so'ng vazirlar munosabatlarni jonlantirishga kelishgan.

Uning aytishicha, bunga jiddiy sabab bor.

"Rossiya muhim davlat. Global siyosiy o'yinchi. Shu sabab u bilan muloqot qilmay bo'lmaydi," deydi alyans rahbari.

Ammo, deydi Sxeffer, ikki tomon siyosatidagi qarama-qarshiliklar hali ham mavjud.

"NATO Rossiyaning Abxaziya va Janubiy Osetiyani tan olishiga, u yerda harbiy bazalar qurish rejalariga qarshi, chunki ushbu hududlar Gruziya tarkibida ekanini unutmaslik lozim," deydi Sxeffer.

AQSh Davlat kotibi Xillari Klintonning aytishicha, Rossiya bilan ishlash qanchalik murakkab bo'lmasin, o'zaro manfaatli masalalar ham yo'q emas.

"Ba'zi yo'nalishlar bo'yicha Rossiya bilan hamkorlik havoday zarur. Yadro qurollarini tarqatmaslik, strategik qurollarni cheklash, terrorizm va intellektual mulk o'g'rilariga qarshi kurash," deydi Klinton.

Bugun AQSh bosh diplomati Jenevada Rossiya Tashqi ishlar vaziri Sergey Lavrov bilan uchrashadi.

Afg'oniston masalasida Klinton NATO a'zolari, donor mamlakatlar hamda Afg'onistonga qo'shni davlatlar ishtirokida xalqaro anjuman o'tkazish taklifini o'rtaga tashlagan. Unga Eron ham taklif qilinishi mumkin.

Afg'oniston va Pokistondagi muammolarni bartaraf etishda mintaqaviy hamkorlik juda muhim, deydi u.

"Xillari Klinton Yevropada mudofaa tizimi rejasi haqida ham to'xtalib, uning qit'a xavfsizligi uchun ahamiyatiga urg'u bergan. Lavrov bilan uchrashuv chog'ida mana shu masala ko'tariladi," deydi Klinton.

XS
SM
MD
LG