Breaking News

Indoneziyada yo'qolgan samolyot cho'kkan bo'lishi mumkin


Indoneziya qutqaruv xizmatining tan olishicha, bortida 162 odam ketayotgan "AirAsia" samolyoti cho'kkan bo'lishi mumkin.

Aerobus yakshanba kuni ertalab Yava dengiziga qulagani taxmin qilinmoqda.

Bedarak ketgan laynerni qidirish ishlari davom etayapti va yo'lovchilarning qarindoshlari hanuz umidvor.

Xalqaro darajada olib borilayotgan qidiruv ishlariga kemalar, samolyotlar va vertolyotlar jalb qilindi. Bir necha davlat, jumladan, Qo'shma Shtatlar yordam taklif qilgan.

Ayrim xabarlarda qidiruv paytida allaqanday qoldiqlar aniqlangani aytilmoqda. Biroq yo'qolgan yo'lovchi samolyotiga aloqadormi-yo'q, hali noma'lum.

Arzon chiptalar taklif qiluvchi "AirAsia" havo yo'llarining samolyoti Indoneziyaning Surabaya shahridan Singapurga uchayotgan bo'lgan. Havoga ko'tarilgach, ko'p o'tmay Aerobus bilan aloqa uzilgan.

Pilot dovuldan xavfsizroq balandlikda uchish uchun ruxsat so'ragani ma'lum. Biroq pastroqda boshqa samolyot bo'lgani sababli uchuvchiga rad javobi berilgan. Ana shundan so'ng aloqa to'xtagan.

"AirAsia" kompaniyasi rahbari Toni Fernandes voqeadan dahshatdamiz, deydi. Hozir kompaniya oldida turgan ustuvor vazifa - yo'lovchilar va ekipaj a'zolarining yaqinlariga hamdard bo'lish, ularni qo'llab-quvvatlab tergovga yordam berishdir, deydi u.

Samolyotda indoneziyalik 149 fuqaro, janubiy koreyalik uch shaxs, shuningdek, Britaniya, Malayziya va Singapurdan yo'lovchilar bo'lgan. Ekipaj tarkibida Indoneziyaning olti fuqarosi va bir fransuz uchuvchi bor edi.

  • 16x9 Image

    Amerika Ovozi

    "Amerika Ovozi" - Vashingtonda asoslangan xalqaro teleradio, 45 tilda efirga chiqadi. O'zbek tilidagi ko'rsatuv va eshittirishlarda nafaqat xalqaro hayot balki siz yashayotgan jamiyatdagi muhim o'zgarishlar va masalalar yoritiladi. O'zbek xizmati AQSh poytaxtida olti kishilik tahririyatga va Markaziy Osiyo bo'ylab jamoatchi muxbirlarga ega.

XS
SM
MD
LG