Sobiq g'animlar Birinchi jahon urushini xotirlayapti

  • Amerika Ovozi

Fransiya rahbari Fransua Olland, Germaniya prezidenti Yoaxim Gauk bilan quchoq ochib ko'rishdi. 100 yil oldin, 1914-yilda Germaniya Fransiyaga urush ochgan.

Fransiya rahbari Fransua Olland, Germaniya prezidenti Yoaxim Gauk bilan quchoq ochib ko'rishdi. 100 yil oldin, 1914-yilda Germaniya Fransiyaga urush ochgan.

Yevropa rasmiylari Birinchi jahon urushida halok bo'lgan askarlarni xotirlayapti. Belgiya urush boshlanganiga 100 yil to'lishi munosabati bilan xotira marosimlari o'tmoqda.

Belgiya qiroli Felipe va qirolicha Matilda marosimga mezbonlik qilayapti. Bu davlat askarlari urushning ilk kunlarida Germaniya bosqiniga qarshi kurashgan, Fransiyaga hujumni birmuncha kechiktirishga muvaffaq bo'lgan edi.

Yig'inda Fransiya rahbari Fransua Olland, Germaniya prezidenti Yoaxim Gauk, Britaniya Bosh vaziri Deyvid Kameron ishtirok etdi, shuningdek, Britaniya shahzodasi Vilyam qatnashdi. So'zga chiqqan mehmonlar Yevropa davlatlari o'rtasida birdamlik haqida gapirdi. Urushda o'zaro jang qilgan bu mamlakatlar bugunda ittifoqchilar, hamkorlar.

1914-yilning 4-avgustida Germaniya Belgiyaga hamla qilgan; Britaniya esa urush e'lon qilib keng qamrovli harbiy harakatlar boshlanib ketgan.

Taraflar urush bir yildayoq tugashiga ishonchi komil edi. Biroq qonli, shafqatsiz janglar to'rt yildan oshiq davom etdi.

Dushanba kechqurun Britaniyadagi me'moriy obidalarda chiroqlar bir soatga o'chirildi. Shu tariqa Fransiyaning ittifoqchisi Britaniya Germaniyaga urush ochgan damlar xotirlandi.

Fransiya rahbari Olland bugun Germaniya va Fransiya o'rtasidagi mustahkam rishtalarni, tinchlikka asoslangan munosabatlarni olqishladi. Ammo Yevropa Ittifoqi oldida murakkab iqtisodiy, siyosiy dovonlar turganini e'tirof etdi.

Germaniya prezidenti Gauk Yevropa qiyinchiliklar bilan yuzlashayotganini tan oldi. Lekin Birinchi jahon urushida jang qilgan askarlar o'z davri muammolarini bugungi Yevropa muammolariga jon deb almashgan bo'lishi aniq edi, deydi Gauk.

  • 16x9 Image

    Amerika Ovozi

    "Amerika Ovozi" - Vashingtonda asoslangan xalqaro teleradio, 45 tilda efirga chiqadi. O'zbek tilidagi ko'rsatuv va eshittirishlarda nafaqat xalqaro hayot balki siz yashayotgan jamiyatdagi muhim o'zgarishlar va masalalar yoritiladi. O'zbek xizmati AQSh poytaxtida olti kishilik tahririyatga va Markaziy Osiyo bo'ylab jamoatchi muxbirlarga ega.

XS
SM
MD
LG