Amerikada politsiyaga qarshi namoyishlar

  • Amerika Ovozi

AQShning Nyu-York, Vashington va boshqa shaharlarida namoyishlar avj oldi. Shu yilning iyulida oq tanli politsiyachi qurolsiz qora tanli fuqaroni bo'g'ib o'ldirgani sudda ko'rilayotgan edi. Maslahatchilar ishtirokidagi sud majlisi xulosasiga ko'ra, politsiyachi aybsiz.

Hukm ayon bo'lgach, Nyu-Yorkning "Tayms Skver" maydonida o'nlab odamlar yig'ildi. Fuqarolar adolat talab qilib, yerga ko'ksini berib yotdi. "Unsiz qurbonlar" namoyishi edi bu.

Yo'lovchi telefonida tasmaga tushirgan bu voqeada 43 yoshli Erik Garner Nyu-York politsiyachilari bilan talashib qoladi. Huquq-tartibot xodimlari uni ruxsatsiz sigareta sotayotgani uchun hibsga olmoqchi bo'ladi. Ofitser Daniel Pantaleo Garnerni orqasidan kelib qattiq bo'g'ib, yerga yotishga majbur qiladi.

Videodan ko'rish mumkinki, astmasi bor Garner bir necha bor "Nafas ololmayapman!" degan. Vrach xulosasiga qaraganda, Garner bo'g'ilish natijasida o'lgan. Holbuki, Nyu-York politsiya departamentida 1993-yildan beri fuqaroni bunday bo'g'ib qo'lga olish taqiqlangan.

Amerika Adliya vaziri Erik Xolder kecha Garnerning ishi yuzasidan fuqarolik huquqlariga doir tergov boshlashga ko'rsatma berdi. Marhumning oilasi va inson huquqlari faollari bir necha oydan beri shunday talab bilan chiqayotgan edi.

Ofitser Daniel Pantaleoning ishi yuzasidan hukm Missuridagi g'alayonlar hali tinmagan bir paytga to'g'ri keldi. Missuri shtati, Ferguson shahrida oq tanli politsiyachi qurolsiz qora tanli o'smirni otib o'ldirgan, sud politsiyachida ayb yo'q, deya xulosa qilgan edi.

Pantaleo chorshanba kungi bayonotida "Janob Garnerning o'limidan juda afsusdaman, hech kimga jabr qilmoqchi emas edim" degan.

Garnerning rafiqasi bu bayonotni qabul qilmayapti. "Nafas ololmayapman, deya hayqirgan paytida quloq solishi kerak edi. Odam hayotining qadri yo'q-mi? 11 bor hayqirgan erim, politsiyachi esa parvoyiga keltirmagan", - deydi ayol.

Prezident Barak Obamaning aytishicha, afro-amerikaliklarning g'azabini tushunsa bo'ladi. "Odamlar huquq-tartibot xodimlari xalqqa xizmat qilmayotgani, adolatsiz muomala qilayotganidan shikoyat qilmoqda", - deydi Obama. "Ba'zida bu shikoyatlarda asos bor", - deydi prezident. Davlat rahbari sifatida bu muammoni hal qilish vazifam, deydi u.

  • 16x9 Image

    Amerika Ovozi

    "Amerika Ovozi" - Vashingtonda asoslangan xalqaro teleradio, 45 tilda efirga chiqadi. O'zbek tilidagi ko'rsatuv va eshittirishlarda nafaqat xalqaro hayot balki siz yashayotgan jamiyatdagi muhim o'zgarishlar va masalalar yoritiladi. O'zbek xizmati AQSh poytaxtida olti kishilik tahririyatga va Markaziy Osiyo bo'ylab jamoatchi muxbirlarga ega.

XS
SM
MD
LG