Nyu-York saylovdan oldin Ted Kruzni sovuq qarshilayapti

  • Amerika Ovozi

Ted Kruz Nyu-York shtatida targ'ibot qilmoqda

Ted Kruz Nyu-York shtatida targ'ibot qilmoqda

Nyu-York shtatida partiyaviy saylovlarga bir hafta qolar ekan, Respublikachilar partiyasidan prezidentlikka da'vogar Ted Kruzning bir izohini nyu-yorkliklar va uning siyosiy raqiblari keskin tanqid qildi. Bu esa texaslik senatorga saylov kuni qimmatga tushishi mumkin.

Nyu-yorkliklar Kruzni “Muhojirlarga qarshi bo'lsang, bu yerga kelma!" degan shiorlar bilan kutib oldi.

Nomzod shaharning barcha besh rayonida sovuq qarshilanmoqda.

“Kelgan joyiga qaytsin”, - deydi bruklinlik bir ayol.

Ted Kruz yanvar oyidagi chiqishida saylovdagi raqibi, tadbirkor Donald Trampni tanqid qilarkan, uni Nyu-York qadriyatlarini, ijtimoiy-liberal qadriyatlarni o'zida mujassamlantirgan nomzod deb aytgan edi. Shundan so'ng Nyu-York shahar va shtat rahbarlari senatordan izohi uchun uzr so'rashni talab qildi.

“Abortga qarshi bo'lgan, an'anaviy oila munosabatlari tarafdori bo'lgan, qurolga egalik qilish huquqini qo'llab-quvvatlayotgan nyu-yorkliklardan uzr so'rayman", - dedi Kruz aholining konservativ qismini nazarda tutib.

Nomzod Nyu-York gubernatori Endryu Kuomo bunday odamlarga liberal Nyu-Yorkda joy yo'q deb aytganini eslatdi.

Bu shtatda o'tkazilgan ommaviy so'rov natijalariga ko'ra, Kruz Trampdan 35 foiz ortda ketmoqda. Tadbirkor senatorning izohini o'ziga qarshi qo'lladi.

“Kruzning hazar bilan "Nyu-York qadriyatlari" deganiga e'tibor bering", - dedi u.

Yana bir respublikachi nomzod, Ogayo gubernatori Jon Keysik televideniye orqali "Qadriyatlar" degan reklama buyurtirdi:

“Ted Kruz Nyu-York qadriyatlarini mensimayapti. U aksariyat odamlar Nyu-York qadriyatlari nima ekanini juda yaxshi bilishini aytadi. Ted Kruz ovoz olish uchun odamlarni bo'lib qo'ymoqda. Jon Keysik esa muammolarni hal qilish uchun ularni birashtirmoqda”, deyiladi reklamada.

Odatda Nyu-York respublikachilari ijtimoiy konservatizm bobida Kruzning elektorati hisoblangan janubdagi injilchilardek mukkasidan ketmagan bo'lsa-da, ular orasida ham Kruz tarafdorlari bor. Masalan, Brayton Bichda yashovchi ortodoks yahudiylar nomzodning oilaviy qadriyatlarga doir qarashlarini qo'llab-quvvatlaydi.

“U ma'naviyatni himoya qilmoqda, oilaning mustahkam bo'lishi muhim", - deydi Daniel ismli yahudiy.

Boshqalar Kruzning noqonuniy muhojirlarga qarshi qattiq turishini yoqtiradi.

“Uyingizga begona odam sizdan beruxsat kirib qolsa, uni mehmon qilmaysiz. Biz ham mamlakatimizga noqonuniy kirganlarni haydashimiz kerak", - deydi yana bir yahudiy.

Biroq saylovlarga sanoqli kunlar qolarkan, Kruz aksariyat nyu-yorkliklar ko'nglini olishni uddalashi amri mahol.

  • 16x9 Image

    Amerika Ovozi

    "Amerika Ovozi" - Vashingtonda asoslangan xalqaro teleradio, 45 tilda efirga chiqadi. O'zbek tilidagi ko'rsatuv va eshittirishlarda nafaqat xalqaro hayot balki siz yashayotgan jamiyatdagi muhim o'zgarishlar va masalalar yoritiladi. O'zbek xizmati AQSh poytaxtida olti kishilik tahririyatga va Markaziy Osiyo bo'ylab jamoatchi muxbirlarga ega.

XS
SM
MD
LG