Isroil hujumi Suriya mojarosini yanada chigallashtirdi

  • Amerika Ovozi

Suriya Tashqi ishlar vazirligi Isroil havo kuchlari bizga hujum qildi, deya Birlashgan Millatlar Tashkilotiga shikoyat qilgan va javob qaytarishga haqli ekanini ta’kidlamoqda.

Hujum tafsilotlari ma’lum emas. Livanga qurol-aslaha olib ketayotgan kolonna nishonga olingani taxmin qilinyapti. Suriya hukumatining da’vo qilishicha esa Isroil havo kuchlari poytaxt Damashq yaqinidagi ilmiy markazni bombardimon qilgan.

Mahalliy matbuotda bu AQSh va NATO tomonidan amalga oshirilgan “agressiya” deb yoritilyapti.

AQSh rasmiylarining aytishicha, Isroil samolyotlari Suriya Hizbulloh guruhiga yetkazmoqchi bo’lgan raketalarni yo’q qilgan. Yahudiy davlati harbiy operatsiya haqida lom-mim demaydi.

Yaqin Sharq bo’yicha mutaxassis Riyod Kahvajiy hujumni Suriya hukumatiga nisbatan ogohlantirish deb ko’radi.

“Xabarlarga ishonadigan bo’lsak, Suriya Hizbullohga havo hujumiga qarshi raketalarni yetkazmoqchi bo’lgan. Havodan nishonga olingan ilmiy markaz esa kimyoviy qurollarga aloqador bo’lishi mumkin”, - deydi u.

Ma’lumki, Livanda asoslangan Hizbulloh guruhining maqsadlaridan biri Isroilni yo’q qilish. G’arbda bu guruh terrorchi tashkilot deb belgilangan.

Suriya va yaqin ittifoqchilari Eron va Rossiya Isroil hujumini bir ovozdan qoraladi. Yahudiy davlati uchun bu jiddiy oqibatlarga olib keladi, deydi Tehron rasmiylari.

Bugun iste’foga chiqayotgan AQSh Davlat kotibasi Xillari Klinton so’nggi bor jurnalistlar bilan uchrashdi. Uning aytishicha, Eron Suriyaga harbiy va moliyaviy ko’makni oshirgan va Rossiya ham prezident Bashar al-Assadga qurol-aslaha bilan yordamlashyapti.
  • 16x9 Image

    Amerika Ovozi

    "Amerika Ovozi" - Vashingtonda asoslangan xalqaro teleradio, 45 tilda efirga chiqadi. O'zbek tilidagi ko'rsatuv va eshittirishlarda nafaqat xalqaro hayot balki siz yashayotgan jamiyatdagi muhim o'zgarishlar va masalalar yoritiladi. O'zbek xizmati AQSh poytaxtida olti kishilik tahririyatga va Markaziy Osiyo bo'ylab jamoatchi muxbirlarga ega.

XS
SM
MD
LG