"Janubda bizneslar tiklansa, ertangi kunga ishonch ham bo'ladi"

  • Amerika Ovozi

Yozgi g'alayondan so'ng Qirg'iziston iqtisodiyoti qattiq oqsamoqda, janubiy viloyatlarda minglab odamlar uysiz, ishsiz, mol-mulki barbod bo'lgan.

Yozgi g'alayondan so'ng Qirg'iziston iqtisodiyoti qattiq oqsamoqda, janubiy viloyatlarda minglab odamlar uysiz, ishsiz, mol-mulki barbod bo'lgan.

Xalqaro hamjamiyat Qirg’iziston janubida, O’sh va Jalol-Obodda yozgi qirg’in paytida ziyon ko’rgan kichik va o’rta biznesni tiklashda yordam ko’rsatmoqda.

AQShning “Mercy Corps-Mersiko” nohukumat tashkiloti etnik to’qnashuvlar oqibatlarini bartaraf etish yo’lida loyihalarga jami 6 million dollar sarmoya ajratgan.

“Biz kichik biznesni tiklash uchun tadbirkorlarga grantlar berayapmiz. Toki yana mahsulot chiqara boshlasin yoki aholiga xizmat ko’rsatsin”, - deydi tashkilotning Qirg’izistondagi vakili Tom Xensli.

Uning aytishicha, bizneslar yana ishga tushsa, umumiy vaziyat o’nglanadi, odamlarda ertangi kunga ishonch paydo bo’ladi. Ayni paytda tashkilot oziq-ovqat ta’minoti, elatlarni yaqinlashtirish borasida ham ishlamoqda.

O’shlik tahlilchi Svetlana Gafarova nazarida Qirg’iziston iqtisodiyoti va boshqaruv tizimlarini tiklashda xalqaro tashkilotlar ko’magi zarur.

“Hozir davlat miqyosida huquq-tartibot tizimini islohot qilish borasida so’z ketmoqda. Jumladan, kadrlar almashishi, aholi bilan yaqinroq muomalada bo’lishi kutilmoqda. Bunda xalqaro hamjamiyat tajribasi qo’l keladi”, - deydi Svetlana Gafarova.

“Ikkinchidan, jamiyatning huquqiy tarbiyasiga, savodxonligiga urg’u bermoq darkor. Chunki huquqini bilgan odam o’zgalar huquqini ham biladi va o’zini himoya qila oladi”, - deydi Gafarova.

Tahlilchilar xalqaro hamjamiyat yordami mahsuldorligini oshirish darkor, deb hisoblaydi. Loyihalar bir-birini takrorlamasligi va haqiqatan yordamga muhtoj qatlamlarga yetib borishi zarur, deydi ular. Bu borada mahalliy idoralar bilan keng hamkorlik kerakligi aytiladi.

  • 16x9 Image

    Amerika Ovozi

    "Amerika Ovozi" - Vashingtonda asoslangan xalqaro teleradio, 45 tilda efirga chiqadi. O'zbek tilidagi ko'rsatuv va eshittirishlarda nafaqat xalqaro hayot balki siz yashayotgan jamiyatdagi muhim o'zgarishlar va masalalar yoritiladi. O'zbek xizmati AQSh poytaxtida olti kishilik tahririyatga va Markaziy Osiyo bo'ylab jamoatchi muxbirlarga ega.

XS
SM
MD
LG