Nyu-York, terror xurujlaridan 10 yil o'tib

  • Amerika Ovozi

Nyu-York

Nyu-York

Nyu-Yorkdagi xurujlardan 10 yil o'tib, qurilishlar avj olib, azim shahar yanada ko'rkamlashgan. Aholisi soni ham o'smoqda. Har yili shaharga 40 milliondan ziyod odam sayohat qiladi.

Nyu-York shahrining ko'p joylari o'zgarmagan. "Tayms Skver" xiyoboni hali ham odamlar va mashinalar bilan gavjum. Beshinchi Avenyu hamon xaridorlarni o'ziga tortyapti. "Ozodlik Ma'budasi" esa Nyu-York sohiliga kelganlarni hanuz olqishlayotgandek.

Ammo bir vaqtlar Jahon savdo markazining egizak osmono'par binolari qad ko'targan joyni hozir tanib bo'lmaydi.

Nyu-yorklik Jen Jef va Adam Sills 2001-yil voqealari haqida eslamaslikka harakat qilamiz, garchi Nyu-York terrorchilar uchun hali ham nishon ekaniga qaramay, deydi ular. Turli millat vakillari yashovchi Bruklindan ketmaymiz, deydi Jen.

"Bu yerni xush ko'ramiz. Ancha o'rganib qolganmiz. Odamlarini, bu yerdagi xilma-xillikni sevamiz. Ko'chaga chiqsangiz, qulog'ingizga turli tillardagi suhbatlar chalinadi", - deydi Jen Jef.

Xurujlardan keyin nyu-yorkliklar umidni boy bermadi, deydi Jenning turmush o'rtog'i Adam.

"Nyu-York o'zining kuchli va chidamli shahar degan nomini oqladi. Boshimizga qanday qiyinchiliklar tushmasin, hammasidan eson-omon chiqdik. Odamlarimizning ruhiyatiga tasanno. Muammolarga bardosh beribgina qolmay, ularni yengishga ham qodirmiz", - deydi Adam.

Kolumbiya universitetida psixologiya bo'yicha professor Jorj Bonannoning aytishicha, Nyu-York ahlining 11-sentabr voqealariga munosabati mamlakatning boshqa burchaklaridan ancha farq qildi.

Shahar aholisi boshqa hududlardagi amerikaliklarga qaraganda o'ziga ancha tez keldi, deydi u.

"Boshqa joylarga e'tibor bersak, 11-sentabr voqealaridan bir necha yil o'tib ham tushkunlik hukm surdi, ammo Nyu-Yorkda bu tez o'tib ketdi", - deydi professor.

Ammo o'sha mudhish kunni ayrimlar kechagidek eslaydi. Yudelka Sepeda advokatlik firmasida ishlaydi.

"11-sentabr voqealari haqidagi tasvirlarni ko'rsam, ko'zimga yosh kelaveradi, dilim tilka-pora bo'lganday. U kunni eslash men uchun juda og'ir", - deydi u.

Sepeda Nyu-Yorkning Bronks rayonida, qarindosh-urug'lari yonida yashaydi. Nyu-Yorkni sevaman, deydi u. Ammo o'zimni xavfsiz his qilolmayman bu yerda. 13 yashar qizimning taqdiridan bezovtaman, deydi u.

"Tinchroq, aholisi kamroq, metrosi, baland imoratlari yo'q shaharga ko'chishni istayman. Nyu-York har qalay hammaning va, ayniqsa, terrorchilarning diqqatini o'ziga tortadigan shahar", - deydi u.

Sepedaning fikricha, tiqilinch jamoat transporti terrorchilar uchun eng yaxshi nishon. Qizim maktabga metroda borgani uchun doim xavotirlanaman, deydi u.

"Biror kor-hol bo'lmasin deyman unga. Axir uni himoya qilishga ojizman, qo'limdan hech narsa kelmaydi", - deydi Sepeda.

Boshqalar nazarida xavotirga o'rin yo'q. Adam Sills oilam Nyu-Yorkka bo'lgan mehrimni yanada oshirdi, deydi.

"Nyu-York men uchun juda qadrdon joy. Bu yerda katta bo'ldim. Farzandimni voyaga yetkazyapman. Hayotim shu shaharda o'tmoqda. Bu yerda yashayotganimdan afsuslanmayman", - deydi u.

Adam singari fikrlaydiganlar oz emas. Ayrim ma'lumotlarga ko'ra, kelasi 20 yilda bir millionga yaqin odam Nyu-Yorkka, o'tmishdan ko'ra bugungi kun va kelajakka qarab yashovchi shaharga ko'chishi kutilmoqda.

  • 16x9 Image

    Amerika Ovozi

    "Amerika Ovozi" - Vashingtonda asoslangan xalqaro teleradio, 45 tilda efirga chiqadi. O'zbek tilidagi ko'rsatuv va eshittirishlarda nafaqat xalqaro hayot balki siz yashayotgan jamiyatdagi muhim o'zgarishlar va masalalar yoritiladi. O'zbek xizmati AQSh poytaxtida olti kishilik tahririyatga va Markaziy Osiyo bo'ylab jamoatchi muxbirlarga ega.

XS
SM
MD
LG