"Rosie the Riveter" - Amerikaning temir ayollari

  • Amerika Ovozi

Ikkinchi Jahon urushi davrida kemalar va samolyotlarni qurishda yordam bergan ayollarni "Rosie the Riveter" - Temir Rouzi deya atashgan. Rassom Norman Rokvell bu qiyofani topib chizgan. Bugun ayollar og’ir sanoatda band. Los-Anjelesda xotin-qizlarning mehnatiga bag’ishlangan ko’rgazma o'tdi.

Xotin-qizlar tank, boshqa og’ir aslahani qurgan. Ikkinchi jahon urushi yillarida front ortida qattiq mehnat qilgan.

Zamonaviy Rouzilar poyezdlar va tramvaylarni qoyillatib yasaydi. Los-Anjelesdagi vokzalda bu ayollarning ishini sharaflovchi ko’rgazma o’tdi.

Konni Makkoy Oxayodagi Simens zavodida poyezdlar uchun qismlarni yasab o’rnatadi. Og’ir sanoatda maosh yaxshi:

“Bundan tashqari, qo’l mehnati baribir boshqacha”.

Mexanik Eymi Rasmussen Kaliforniyada, Yaponiyaga qarashli Kin-Ki-Shar-Yo kompaniyasi zavodida yengil tramvaylarni yasaydi. Aksariyat hamkasblari erkaklar. Yaqinda rahbarlik lavozimiga o’tdi.

“Hech muammo bo’lgan emas. Boshida sal ikkilanishdi, lekin qilayotgan ishimni ko’rib, rahbarlik ishiga olishdi. Qo’limdan ko’p ish keladi”, - deydi Rasmussen.

Janubiy Kaliforniya universiteti o’tkazgan so’rovga ko’ra, bugungi Rouzilar temiryo’l sanoatida ishchi kuchining faqat 13 foizini tashkil etadi. Butun sanoatda ular bor-yo’g’i 30 foiz. Lekin qilayotgan ishlari salmoqli, deydi Jobs to Move America tashkilotidan Madelin Jenis:

“Payvandchi, elektrik, montajchi. Bu ayollar hamma to’siq va qarashlarni yengib o’ta oldi. Og’ir kasblarga ishga o’rnashish uchun yaxshigina jasorat kerak”.

“Bunyodkor ayollar” nomli ko’rgazmada ayollarning Ikkinchi Jahon urushidagi faoliyatini ko’rasiz. Bundan tashqari, bugun xotin-qizlar qilayotgan 15 murakkab kasbni ham. Nufuzli Pulitser mukofoti sohibi, fotograf Din Fitsmoris ko’rgazma uchun ayollarni suratda oldi:

“Fotojurnalist sifatida asosan erkaklar hukmron sohada ishlayman. Shu sababli bu ayollarni juda yaxshi tushunaman. Rouzi – mustahkam iroda, tinimsiz mehnat va kuch-qidrat timsolidir”.

Sobiq mehnat vaziri, Los-Anjeles mutasaddisi Xilda Solisning aytishicha, nufuzli ishlarda xotin-qizlar hanuz ozchilik:

“Siyosiy lavozimlar va katta korporatsiyalarda ayollar ko’proq sonni tashkil etishi kerak”.

Sanoatda ish o’rinlari esa oshib borayapti, deydi Kaliforniya Temiryo’l ma’muriyatidan Mishel Baym:

“Kaliforniyada ajoyib, bir necha milliard dollarlik qurilish dasturi ustida ish ketayapti. Ko’plab xotin-qizlar xizmatda muvaffaqiyat qozonishi uchun ham yaxshi imkoniyat bu”.

Jahonning barcha o’sayotgan iqtisodiyotlarida Rouzilarga talab katta.

  • 16x9 Image

    Amerika Ovozi

    "Amerika Ovozi" - Vashingtonda asoslangan xalqaro teleradio, 45 tilda efirga chiqadi. O'zbek tilidagi ko'rsatuv va eshittirishlarda nafaqat xalqaro hayot balki siz yashayotgan jamiyatdagi muhim o'zgarishlar va masalalar yoritiladi. O'zbek xizmati AQSh poytaxtida olti kishilik tahririyatga va Markaziy Osiyo bo'ylab jamoatchi muxbirlarga ega.

XS
SM
MD
LG