Suriya hukumati 900 dan ziyod odamlarni qamoqdan ozod etgan. Sano davlat axborot agentligiga ko'ra, barchasi so'nggi oylardagi namoyishlarga aloqador, ammo biror jiddiy jinoyat sodir etmagan. Oy boshida ham 1700 dan ortiq kishi qo'yib yuborilgan edi, deydi agentlik.
Bu o'rtada Suriyadagi ahvolni kuzatayotgan inson huquqlari tashkilotining ma'lum qilishicha, Daraa viloyatidagi bir qishloqda xavfsizlik kuchlari reydlar o'tkazmoqda, armiyadan qochganlar bilan olishmoqda.
Suriyani fuqarolariga qarshi zulmda ayblayotgan Turkiya bu davlat rahbarlarining Turkiyadagi mulklarini muzlatishini aytmoqda. Shuningdek, Suriya Markaziy banki bilan aloqalar to'xtatilib, qurol embargosi joriy etiladi va strategik hamkorlik haqidagi bitim bekor qilinadi.
