Suriya hukumati va BMT monitoring masalasida kelishdi

  • Amerika Ovozi

Hims ko'chalari

Hims ko'chalari

Suriyada zo’ravonlik tinmayotgan bir paytda hukumat va Birlashgan Millatlar Tashkiloti tinchlik yo’lida yangi rejani ma’qullagan.

BMT va Arab Ligasi elchisi Kofi Annanning aytishicha, rejada yuzlab xalqaro kuzatuvchilar roli, bir hafta oldin kuchga kirgan sulh ijrosini tekshirish uchun sharoit yaratish kabilar belgilangan.

Annan mazkur loyiha borasida muxolifat bilan ham muzokara olib bormoqda. Lekin bitim ijrosiga ishonch hamon kam.

BMT Bosh kotibi Pan Gi Mun Xavfsizlik Kengashidan Suriyada uch oylik tinchlikparvar missiyani ma’qullashni so’ragan. Mamlakatning 10 shahar va viloyatiga 300 kishini jo’nataylik, deydi u. Hozir tashkilotning olti mutaxassisi Suriyadagi ahvolni kuzatmoqda.

Faollarning aytishicha esa bugun Deyr al-Zur shahrida armiyadan yuz o’girgan askarlar va xavfsizlik kuchlari to’qnashgan. Bir kishi o’lib, bir necha fuqaro yaralandi, deydi Britaniyada asoslangan Suriyada huquqiy ahvolni kuzatuvchi guruh. Hims shahrida ham portlashlar bo’lgani aytilmoqda.

BMT Tinchlikparvar departamenti rasmiysi, general Abxijit Guha Damashqda Suriya mulozimlari bilan uchrashdi, 19-aprel, 2012-yil

BMT Tinchlikparvar departamenti rasmiysi, general Abxijit Guha Damashqda Suriya mulozimlari bilan uchrashdi, 19-aprel, 2012-yil

Bugun Parijda arab va Yevropa davlatlari tashqi ishlar vazirlari ishtirokida “Suriyaning do’stlari” nomli guruh uchrashuvi o’tmoqda va unda Amerika Davlat kotibasi Xillari Klinton qatnashishi kutilmoqda.

Klinton ta’rificha, Suriyada ahvol “qaltis bir pallaga” yetdi.

“Ikki yo’l bor. Tinchlik rejasiga muvofiq, xalqaro hamjamiyat kuzatuvida konflikt sekin-asta tugaydi va osuda hayotga qaytiladi. Yoki prezident Bashar al-Assad oxirgi imkoniyatni ham qo’ldan chiqarib, jahon ahli qo’shimcha jazo chorasini ko’rishga majbur bo’ladi”, - deydi Klinton.

Suriya muxolifati nazarida tinchlik rejasida aholini qotilliklardan himoya qilishdek muhim band chetda qolmasligi lozim.

Birlashgan Millatlar Tashkiloti hisob-kitobiga qaraganda, o’tgan yil martidan beri Suriyada 9 mingdan oshiq odam jon bergan.

  • 16x9 Image

    Amerika Ovozi

    "Amerika Ovozi" - Vashingtonda asoslangan xalqaro teleradio, 45 tilda efirga chiqadi. O'zbek tilidagi ko'rsatuv va eshittirishlarda nafaqat xalqaro hayot balki siz yashayotgan jamiyatdagi muhim o'zgarishlar va masalalar yoritiladi. O'zbek xizmati AQSh poytaxtida olti kishilik tahririyatga va Markaziy Osiyo bo'ylab jamoatchi muxbirlarga ega.

XS
SM
MD
LG