Tayvan prezident saylovida muxolifat g'alaba qozondi

  • Amerika Ovozi

Yangi Prezident Say Inven

Yangi Prezident Say Inven

Tayvanda o'tgan prezident saylovlarida muxolif Demokratik progressiv partiyasi g'alaba qozondi. Uning rahbari, 59 yoshli Say Inven orol davlatning ilk ayol prezidenti bo'ladi.

Hukmron Milliy partiyadan nomzod Erik Chu mag'lubiyatni tan oldi.

Yangi prezident Xitoy bilan do'stona aloqalar saqlab qolinishini ta'kidlamoqda. Shu bilan birga, deydi u, Pekin oroldagi demokratik tizimni hurmat qilishi lozim.

Inven xonimga ko'ra, Tayvan xalqining xohish-irodasi Xitoy bilan aloqalar qanday bo'lishini belgilaydi.

Tahlilchilar fikricha, orolda mustaqillik tarafdorlari hokimiyatga kelgani Xitoy bilan munosabatlarni chigallashtirishi mumkin. Tayvan Xitoydan 1949-yilgi fuqarolar urushidan keyin ajralib chiqqan, ammo Xitoy orolni hamon o'ziniki deb biladi.

Milliy partiya Tayvanda hukmron bo'lgan so'nggi sakkiz yil davomida Pekin bilan iqtisodiy aloqalar yaxshilandi, xususan turizm sohasida.

  • 16x9 Image

    Amerika Ovozi

    "Amerika Ovozi" - Vashingtonda asoslangan xalqaro teleradio, 45 tilda efirga chiqadi. O'zbek tilidagi ko'rsatuv va eshittirishlarda nafaqat xalqaro hayot balki siz yashayotgan jamiyatdagi muhim o'zgarishlar va masalalar yoritiladi. O'zbek xizmati AQSh poytaxtida olti kishilik tahririyatga va Markaziy Osiyo bo'ylab jamoatchi muxbirlarga ega.

XS
SM
MD
LG