Tojikistonda G'arbdan borgan ekspert bedarak ketgan


Asli Tojikistonda katta bo'lgan Aleksandr Sodiqov (Alexander Sodiqov) Kanadada yashaydi

Asli Tojikistonda katta bo'lgan Aleksandr Sodiqov (Alexander Sodiqov) Kanadada yashaydi

Tojikistonga Kanadadan borgan ilmiy tadqiqotchi Aleksandr Sodiqov (Alexander Sodiqov) milliy xavfsizlik xizmati tomonidan hibsga olingan. Voqea 16-iyun kuni Tog'li Badaxshon muxtor viloyati poytaxti Xorug' shahrida yuz bergan.

Huquq va demokratiyani targ'ib qiluvchi "Ozodlik uyi" (Freedom House) Tojikiston hukumatidan olim taqdiri haqida ma'lumot berib, uning nimada ayblanayotganini aytishni talab qilmoqda. Sodiqov advokat bilan ta'minlanishi shart, deyiladi tashkilot chaqirig'ida.

Inson huquqlari bo'yicha "Human Rights Watch" xalqaro tashkiloti vakili Stiv Sverdlov (Steve Swerdlow) deydiki, Dushanbe Sodiqov ishi yuzasidan lom-mim demayotgani uning hamon hibsda ekanini anglatadi, lekin uning ikki kundan beri bedarak ketgani xalqaro qonunlarga binoan odam o'g'irlash bilan barobar. Tojikiston uni ozod etsin yoki asosi bo'lsa, rasman ayblasin, deya bildiradi tashkilot.

Tojikiston hukumati bayonotiga ko'ra, Sodiqov chet davlat josusi, biroq aynan qay davlat ekani bildirilmaydi. Yaqinlarining aytishicha, mahbus 16-iyun kuni kechqurun oilasiga telefon qilgan, lekin qayerda va kim tomonidan ushlab turilganini aytolmagan.

Aleksandr Sodiqov - Angliyada asoslangan Ekseter universiteti (University of Exeter) olib borayotgan ilmiy loyiha doirasida vataniga safarda edi. Toronto universiteti doktoranti.

Sodiqov oshkoralikka urg'u beruvchi "Global Voices Online" internet sahifasi muharriri. O'z maqola va bloglarida Tojikiston va butun Markaziy Osiyoni yoritib keladi. Ko'plab tanqidiy materiallar chiqargan.

Amerikalik va kanadalik mutaxassislar Sodiqov taqdiridan xavotir bildirib, Tojikiston hukumatini uning va oilasi xavfsizligini kafolatlashga chaqirmoqda.

"Sodiqov, oilali va bir qizning otasi, olimlarning yangi avlodi. Tojikiston va dunyoni bog'lab turgan va bu aloqalar sermahsul bo'lishi yo'lida o'z hissasini qo'shib kelayotgan insonlardan biri",- deya bildiradi ingliz, rus va tojik tillarida tarqatilgan bayonotga qo'l qo'ygan ekspertlar.

Hamkasblarining tasdiqlashicha, Sodiqov Xorug' viloyatiga bu notinch hududdagi vaziyatni o'rganish uchun borgan. U ishlagan universitet va tashkilotlar hamda yaqinlari nazarida Sodiqovni josuslikda ayblash mantiqsizlikdir.

Tojikiston hukumati o'tgan yillar ichida yanada beqarorlashgan Tog'li Badaxshonga kirishni cheklab keladi. Jangarilar bilan olishayotgan rahbariyat, ayniqsa, jurnalistlar va mustaqil tadqiqotchilarni bu mintaqaga yaqinlashtirmaydi.
  • 16x9 Image

    Navbahor Imamova

    Navbahor Imamova "Amerika Manzaralari" turkumidagi teledasturlar muallifi. TV va radio diktor, prodyuser, muxbir va muharrir. AQSh siyosati va hayoti hamda Markaziy Osiyodagi muhim masalalarni yoritadi. "Amerika Ovozi"da 2002-yildan beri ishlaydi. Jurnalistik faoliyatini 1996-yilda O'zbekiston radiosining "Xalqaro hayot" redaksiyasida muharrir sifatida boshlagan. Jahon Tillar Universiteti Xalqaro jurnalistika fakultetida ham dars bergan. Ommaviy axborot vositalari bo'yicha bakalavrlikni Hindistonning Maysur Universitetidan (University of Mysore), magistrlikni esa AQShning Bol Davlat Universitetidan (Ball State University) olgan. Toshkent viloyati Bo'stonliq tumani Qo'shqo'rg'on qishlog'ida ziyoli oilasida ulg'aygan.

XS
SM
MD
LG