Tolibon afg'on hukumati bilan muzokaradan bosh tortmoqda

  • Amerika Ovozi

Afg'oniston Prezidenti Ashraf G'ani

Afg'oniston Prezidenti Ashraf G'ani

Tolibon Afg'onistonda hukumat bilan tinchlik muzokaralari samara berishiga shubha bilan qaramoqda.

Harakatning "Amerika Ovozi"ga bildirishicha, Tolibon muzokaraga kirishishga tayyor emas. Unga ko'ra, xorijiy kuchlar mamlakatni tark etmagunga qadar, Tolibon rahbarlariga qo'yilgan sanksiyalar bekor qilinmaguniga qadar hamda asirlikdagi toliblar ozod etilmaguniga qadar, muzokaradan natija chiqmaydi.

Tolibonning da'vo qilishicha, AQSh maxsus kuchlarining Afg'onistonda tungi reydlari davom etmoqda, mamlakatga qo'shimcha amerikalik askarlar safarbar etilgan, Tolibonga qarshi amaliyotlar kuchaygan. Bunday sharoitda muzokaradan foyda yo'q, deyiladi Tolibon bayonotida.

AQSh Davlat departamenti harakatni jarayonda qatnashishga da'vat etdi.

"Tolibon bir qarorga kelishi kerak. Yoki samimiy tarzda tinchlik muzokaralarida qatnashishi yoki jarayondan yuz o'girib, urushni davom ettirishi, afg'on birodarlarini o'ldirib, mamlakatining barbod bo'lishiga hissa qo'shishi mumkin", deyiladi Davlat departamenti bayonotida.

Afg'oniston, Pokiston, Xitoy va Qo'shma Shtatlar Tolibon bilan muzokaralarni tashkillashtirishga harakat qilmoqda va jarayon martning birinchi haftasida boshlanadi, deya umid qilmoqda.

  • 16x9 Image

    Amerika Ovozi

    "Amerika Ovozi" - Vashingtonda asoslangan xalqaro teleradio, 45 tilda efirga chiqadi. O'zbek tilidagi ko'rsatuv va eshittirishlarda nafaqat xalqaro hayot balki siz yashayotgan jamiyatdagi muhim o'zgarishlar va masalalar yoritiladi. O'zbek xizmati AQSh poytaxtida olti kishilik tahririyatga va Markaziy Osiyo bo'ylab jamoatchi muxbirlarga ega.

XS
SM
MD
LG