Tramp so'rovlarda Klintondan ortda qolayapti

  • Amerika Ovozi

Trump-Clinton

Trump-Clinton

AQSh prezidentligiga respublikachi nomzod Donald Tramp bahsli chiqishlari bilan doimo omma e’tiborida. Ammo so’nggi so’rovlar uning Hillari Klintondan ortda qolayotganini ko’rsatmoqda.

Florida shtatida so’zlagan milliarder o’z tarafdorlarini hammasi joyida deya ishontirishga urindi.

“Kampaniyamiz, partiyamiz har qachongidan mustahkam va birdam”, - deydi u.

“CNN” telekanali o’tkazgan so’rovda Tramp Klintondan 9 foiz, “NBC” so’rovida esa 8 foiz ortda qolmoqda. Pensilvaniya va Michigan singari hal qiluvchi shtatlarda Klinton oldinga chiqib oldi.

Bunga bir sabab, deydi kuzatuvchilar, milliarder nomzodning musulmon bir oila bilan so’z talashganidir. Hizr Xon demokratlar syezdida so’zga chiqib, Trampni tanqid qilgan edi. Uning o’g’li kapitan Humoyun Xon 2004-yilda Iroqda halok bo’lgan.

Tramp askar oilasiga g’azab bilan javob qaytargani uchun o’z partiyadoshlaridan dakki eshitdi.

“Vatan uchun jonini fido qilgan oilalar hurmatga loyiq”, - deydi senator Jon Makkeyn.

Donald Tramp bundan buyon butun e’tiborini Hillari Klintonga qaratishini aytmoqda.

Klintonga ko’ra esa, Trampning fe’l-atvori va dunyoqarashi uning prezidentlikka nomunosib ekanini yaqqol ko’rsatib turibdi.

Yangi televizion reklamalarda mashhur respublikachilar badavlat tadbirkorni xavfli deya tasvirlab, Klintonga yon bosayotgani ko’rsatilgan.

  • 16x9 Image

    Amerika Ovozi

    "Amerika Ovozi" - Vashingtonda asoslangan xalqaro teleradio, 45 tilda efirga chiqadi. O'zbek tilidagi ko'rsatuv va eshittirishlarda nafaqat xalqaro hayot balki siz yashayotgan jamiyatdagi muhim o'zgarishlar va masalalar yoritiladi. O'zbek xizmati AQSh poytaxtida olti kishilik tahririyatga va Markaziy Osiyo bo'ylab jamoatchi muxbirlarga ega.

XS
SM
MD
LG