Breaking News
Din

Tramp diniy erkinlikka oid yangi farmonni imzoladi


Trampning diniy erkinlikka oid yangi qarori
Iltimos, kuting...

No media source currently available

0:00 0:01:55 0:00

Donald Tramp din erkinligiga oid yangi farmon imzoladi. Prezidentga ko'ra, bu qaror vijdon erkinligini yanada mustahkamlaydi. Ammo farqli qarashdagilar ham bor.

Tramp dindor tarafdorlariga shuni va'da qilgandi. Prezident yangi farmonini quyidagicha ta'rifladi:

"E'tiqodli odamlarning nishonga olinishiga, ovozlari o'chirilishiga ortiq yo'l qo'ymaymiz", - dedi u.

Farmonga ko'ra, cherkovlar va boshqa diniy guruhlar siyosiy fikrlarini bildirishda erkinroq bo'ladi. Ishchilariga tug'ishni nazorat qiluvchi kontraseptiv vositalarni bermaslik huquqi ham kengayadi.

Bu diniy yetakchilar uchun 63 yillik Jonson qonuni ustidan g'alaba, demakdir. Hozirgacha biror siyosiy nomzodni yoqlagan diniy guruhlardan soliq to'lamaslik maqomi olib qo'yilar edi.

Injilchi nasroniylar yetakchisi Jerri Folvel eski tartibning keskin tanqidchilaridan. Bu haqda u Respublikachilar qurultoyida ham so'zlagan edi.

"Ishoning, Jonson qonunining bekor qilinishi konservativ nasroniylar va so'z erkinligi uchun ulkan inqilob bo'ladi", - degandi u.

Prezident farmoni aslida qonunni bekor qilmaydi. Qonun rasman mavjud bo'ladi, lekin kamdan kam amal qiladi.

Din va davlatning ajratilishini xohlovchi amerikaliklar jamiyati rahbari Berri Linning aytishicha, Tramp farmoni aslida mavjud bo'lmagan muammoga asoslangan.

"Amerikadagi dindorlar minbarlarida hech qanday inqiroz yo'q. Siyosiy fikrga qarshi urush ham mavjud emas. Faqat bitta narsa bor: soliq to'lamaslikni istasangiz, davlat idorasi uchun saylanayotgan biror nomzodni yoqlamang. Shu, xolos", - deydi u.

Trampning bu farmoni ham huquqiy to'siqqa duch kelishi mumkin. Amerika Fuqarolik erkinliklari ittifoqi farmon ustidan sudga shikoyat qilishi mumkinligi haqida gapirdi.

  • 16x9 Image

    Amerika Ovozi

    "Amerika Ovozi" - Vashingtonda asoslangan xalqaro teleradio, 45 tilda efirga chiqadi. O'zbek tilidagi ko'rsatuv va eshittirishlarda nafaqat xalqaro hayot balki siz yashayotgan jamiyatdagi muhim o'zgarishlar va masalalar yoritiladi. O'zbek xizmati AQSh poytaxtida olti kishilik tahririyatga va Markaziy Osiyo bo'ylab jamoatchi muxbirlarga ega.

XS
SM
MD
LG