Rossiya ukrainalik uchuvchini ozod etdi

  • Amerika Ovozi

Ukrainalik harbiy ayol Nadejda Savchenko va mamlakat Prezidenti Petro Poroshenko

Ukrainalik harbiy ayol Nadejda Savchenko va mamlakat Prezidenti Petro Poroshenko

Rossiya sudi tomonidan qotillikda ayblanib, 22 yilga qamalgan ukrainalik harbiy Nadejda Savchenko Rossiya Prezidenti Vladimir Putin tomonidan avf etilib, bugun Ukrainaga yetkazildi.

O'zaro kelishuvga ko'ra, Ukraina Prezidenti Petro Poroshenko 14 yilga qamalgan ikki rossiyalikni avf etib, vataniga jo'natib yubordi. Ukraina Aleksandr Aleksandrov va Yevgeniy Yerofeyevni Donbassda jang qilgan rus harbiylari deb biladi, Rossiya esa ular harbiy xizmatdan ketganini, Donbassga o'z xohishiga ko'ra borganini aytadi.

Hibsxonada salkam ikki yil saqlangan 35 yashar Savchenkoni Kiyevda qahramonday kutib olishdi. Sud uni fuqarolar urushi ketayotgan Donbassda rossiyalik ikki jurnalistning o'limiga aloqadorlikda aybdor topgan edi.

Savchenko Donbassga qaytib borib, isyonchilarga qarshi kurashni davom ettirishga so'z berdi.

"Men ozodman. Aksil-terror amaliyotdan qaytmagan farzandlarning ota-onalaridan hali ham tirik ekanim uchun uzr so'rayman. Farzandlari asirda o'tirgan ota-onalardan ozod bo'lganim uchun uzr so'rayman. Qurbonlarni hayotga qaytara olmayman, ammo asirlarni ozod etish uchun qo'limdan kelgancha harakat qilaman, kerak bo'lsa, Ukraina uchun jonimni beraman. Ukraina qahramonlari o'lmasligi kerak. Ayrimlar ularning hayot qolishini istamaydi. Qahramonlar Oliy Radada asosiy kuch bo'lishi kerak", - dedi Savchenko.

Uchuvchi Rossiya sudi qo'ygan ayblovlarni tan olmagan.

Putinning aytishicha, Donbassda halok bo'lgan jurnalistlarning bevalari Savchenkoga muruvvat ko'rsatib, uni ozod etishni so'ragan.

Yevropa Ittifoqining tashqi aloqalarga mas'ul rasmiysi Federika Mogerini Savchenkoning ozod etilganini olqishladi.

Ayrim kuzatuvchilarga ko'ra, Yevropa Ittifoqi bunga javoban Rossiyaga qo'yilgan sanksiyalarni yil oxirigacha yumshatishi mumkin.

  • 16x9 Image

    Amerika Ovozi

    "Amerika Ovozi" - Vashingtonda asoslangan xalqaro teleradio, 45 tilda efirga chiqadi. O'zbek tilidagi ko'rsatuv va eshittirishlarda nafaqat xalqaro hayot balki siz yashayotgan jamiyatdagi muhim o'zgarishlar va masalalar yoritiladi. O'zbek xizmati AQSh poytaxtida olti kishilik tahririyatga va Markaziy Osiyo bo'ylab jamoatchi muxbirlarga ega.

XS
SM
MD
LG