Ukrainada motam e'lon qilindi


Ukraina vertolyoti urib tushirilishi oqibatida paydo bo'lgan qora tutun, 29-may, 2014-yil.

Ukraina vertolyoti urib tushirilishi oqibatida paydo bo'lgan qora tutun, 29-may, 2014-yil.

Ukrainaliklar 29-may kuni vertolyot urib tushirilishi oqibatida halok bo’lgan harbiylarni xotirlamoqda. Ukrainaning Ivano Frankova viloyatida ayrimchilar tomonidan urib tushirilgan vertolyot qurbonlari xotirasiga motam kuni e`lon qilindi.

Ukarina Milliy gvardiyasi uchog`i 29-may kuni aksilterror amaliyoti davom etayotgan Slavyansk shahrida nishonga olingan edi.

Vertolyot qulashi oqibatida halok bo`lgan 14 harbiyning aksariyati Ivano Frankova viloyatidan ekani ma’lum. Qurbonlar orasida Milliy gvardiya general mayori Sergey Kulchiskiy ham bor.

Harbiylar o`limi munosabati bilan o`z hamdardligini bildirgan Ukrainaning yangi saylangan prezidenti Petro Poroshenko jinoyatchilar qilmishi uchun javob berishini ta`kidlagan.

Ukraina sharqidagi vaziyat esa keskinligicha qolmoqda. Hukumat aksilterror amaliyoti jangarilar sharqiy viloyatlardan butunlay siqib chiqarilmaguncha davom etishini bildirmoqda.

30-may kuni Ukraina armiyasi Slavyanskda ayirmachilar joylashgan nuqtalarni havodan nishonga olish amaliyotini qayta boshlagan.

Ayirmachilar orasida chechen jangarilari jang qilayotgani haqidagi ma`lumotlar ortidan to`qnashuvlar tobora kuchayib borayotgani ta`kidlanadi.

AQSh o’z xavotirlarini izhor qilib, Rossiyaning ayirmachilarni qo`llab-quvvatlayotgani vaziyatni yanada og’irlashtirayotganini ma’lum qildi.

Ukraina armiyasi so’zlovchisi Vladislav Seleznyovga ko`ra, ayirmachilar orasida kavkazlik jangarilar bor, ammo ularning kimligi, soni haqida aniq ma`lumot aytish qiyin.

Matbuotda Slavyanskda o`tkazilgan havo amaliyotidan so`ng Chechenistonga o`nlab jangarilar jasadi keltirilgani haqida ma`lumotlar paydo bo’lgan.

Rossiya ayni paytda Donetsk viloyatidagi aholiga gumanitar yordam ko`rsatish iddaosi bilan chiqmoqda. Ukraina Tashqi ishlar vazirligi bunga keskin norozilik notasi bilan javob qildi.

Ayirmachilar Slavyanskdagi bolalar xavfsizligini ta`minlash uchun ularning Rossiya hududiga evakuatsiya qilinishini talab qilib chiqqan. So`nggi ma`lumotlarga ko`ra, 200 nafar bola avtobusda Rossiya hududiga, jumladan, Qrimdagi dam olish lagerlariga jo`natilgan.

Kiyevda esa Rossiya bu harakatdan Ukrainaga qarshi targ`ibotda faol foydalanadi, degan xavotirlar bor. Radadagi ayrim deputatlar shunga qarshi o’z noroziligini izhor qilib, nazoratni qo`lga olishga chaqirishmoqda.
  • 16x9 Image

    Malik Mansur

    Malik Mansur Toshkent Davlat Universitetini (hozirda O'zbekiston Milliy Universiteti) bitirgan. Professional jurnalist. Bu sohada 1990-yilardan beri ishlab keladi. O'zbekistonda qator nashrlarda faoliyat yuritgan. "Amerika Ovozi bilan 2002-yildan buyon hamkorlik qilib keladi. Vatandagi siyosat, iqtisod va ijtimoiy hayotni yoritadi.
     

XS
SM
MD
LG