Kiyevliklar: Xalq sifatida yuksaldik, birlashdik


Mustaqillik kuni munosabati bilan Kiyevda o’tgan paraddan so’ng harbiy texnika separatistlar bilan janglar davom etayotgan sharqqa jo’natildi.

Ukrainaliklar parad xususida turli qarashda, ammo ular Ukraina boshdan kechirayotgan so’nggi hodisalar mamlakatni yanada birlashtirganiga ishonadi.

Harbiy parad prezident, Oliy qo’mondon Petro Poroshenko ishtirokida o’tdi. Ukraina e’lon qilinmagan urushga tortilganini ta’kidlagan prezident suverenitetni saqlab qolish uchun ketayotgan keskin janglar g’alaba bilan yakunlanishiga ishonch bildirdi.

Sharqda ketayotgan janglarga qaramasdan, ukrainlar mustaqillikni keng nishonladi. Oddiy aholi so’nggi hodisalar mustaqillik qadrini yanada oshirganini, xalq tashqi tahdidga nisbatan yanada jipslashganini aytishadi.

“Ukraina mustaqilligiga 23 yil to'ldi, bu unchalik ko’p ham, kam ham emas. Ammo bu yil alohida bir vatanparvarlik tuyg’usi bilan nishonlayapmiz. Urush, so’nggi hodisalar vatan qadrini yanada yuksaltirdi, biz vatanga muhabbat nimaligini yana yaxshiroq angladik”, - deydi kiyevlik ayol.

Ayrimlar oradan 23 yil o’tibgina haqiqiy mustaqillikka erishdik, deydi.

“Bugun Ukraina mustaqilligining birinchi yilini nishonlayapmiz. Gap shundaki, biz faqat endigina Rossiya imperiyasidan qutulishga muvaffaq bo’ldik. Rossiya dunyodagi so’nggi imperiya. Men bugun barchaga omad, baxt va Rossiya imperiyasidan batamom qutulishni tilayman”, - deydi bir fuqaro.

“So’nggi bir yil ichida ukrainlar ichki va tashqi xavfga qarshi turuvchi xalq sifatida, millat sifatida ham yuksaldi. Avvaliga bizni sobiq prezident (Viktor) Yanukovich qiyofasidagi ichki tahdid yemirayotgan edi. Endi esa tashqi xavfga to’qnash turibmiz. Putin va uning to’dasi Ukrainani qullikka qaytarmoqchi. Biz bunga qarshimiz, shunga muvofiq vatanparvarlik ham kuchayib bormoqda”, - deydi yana bir kiyevlik.

Maydonda ko’rikdan o’tgan harbiy texnika paraddan so’ng ayirmachilar bilan janglar davom etayotgan mamlakat sharqiga jo’nab ketdi. Ko’pchilik ukrainlar milliy armiya nochor ahvolda ekani haqidagi chiqishlardan so’ng o’tgan bu harbiy ko’rgazmani lozim deb hisoblashadi.

“Bu harbiy parad odamlarga ishonch baxsh etadi. Nafaqat aholiga, balki mamlakat sharqida jang qilayotgan yigitlarimizga ham ishonch beradi. Shu bois biz bu parad o’tkazilishini, prezidentimizni qo’llab-quvvatlaymiz. Barcha davlatlarga, hatto Rossiyaga ham tinchlik tilaymiz”, - deydi kiyevliklardan biri.

Harbiy texnika ko’z-ko’z qilingan paradni ortiqcha dabdaba deb hisoblovchilar ham bor.

“Bunday harbiy qudrat namoyishidan maqsad nima? Undan ko’ra harbiy qudratni mamlakat mustaqilligi uchun jon berilayotgan joy - sharqda ko’rsatishsin. Shundoq ham hamma biladi, yigitlarimiz mamlakat ozodligi uchun jonlarini tikishga tayyor. Odamlar hozir bu ko’z-ko’zni qabul qilishmaydi, nega shuncha texnikani bayram tantanasi uchun saqlab turishdi? Jang maydonidagi qurbonlar soni har kuni oshib borayotgan bir paytda”, - degan fikrda bir yigit.

Bu fikrlardan qat’i nazar ukrainaliklar mustaqillikning bu yilgi tantanasi vatan qadri va mustaqillik tushunchasini ortiqcha dabdabalardan xoli samimiy bir tuyg’uga aylantirganini e’tirof etishadi.

  • 16x9 Image

    Malik Mansur

    Malik Mansur Toshkent Davlat Universitetini (hozirda O'zbekiston Milliy Universiteti) bitirgan. Professional jurnalist. Bu sohada 1990-yilardan beri ishlab keladi. O'zbekistonda qator nashrlarda faoliyat yuritgan. "Amerika Ovozi bilan 2002-yildan buyon hamkorlik qilib keladi. Vatandagi siyosat, iqtisod va ijtimoiy hayotni yoritadi.
     

XS
SM
MD
LG