AQSh harbiy byudjeti kelasi 10 yilda 500 milliard dollarga kamayadi

  • Amerika Ovozi

Pentagon, AQSh Mudofaa vazirligi

Pentagon, AQSh Mudofaa vazirligi

Dunyodagi eng qudratli davlat – AQShda kelasi 10 yilda harbiylar soni 100 mingga kamayib, mudofaa byudjeti 500 milliard dollarga qisqarishi kutilmoqda. Obama ma’muriyati bu boradagi rejasini Kongressga taqdim etadi.

Iroq va Afg’onistondagi urushlarni yakunlayotgan Qo’shma Shtatlar ixchamroq, ammo olovli nuqtalarda tez va operativ harakatlana oladigan armiyaga ega bo’lmoqchi. Qisqarishlar natijasida kelasi besh yilda qariyb 260 milliard dollar tejab qolinadi, deydi Mudofaa vaziri Leon Panetta.

“Zobitlar soni hozirgi 562 mingdan 490 mingga kamayadi. Harbiy-dengiz xizmatchilari soni esa 202 mingdan 182 mingga tushadi”, - deydi vazir, islohotni raqamlarda ifoda etar ekan.

AQSh Mudofaa vaziri Leon Panetta va general Martin Dempsi, Birlashgan shtablar boshlig'i, Pentagon, 26-yanvar, 2012.

AQSh Mudofaa vaziri Leon Panetta va general Martin Dempsi, Birlashgan shtablar boshlig'i, Pentagon, 26-yanvar, 2012.

Rasmiylarning aytishicha, AQSh F-35 rusumidagi ilg’or jangovar samolyotlarni ham kamroq xarid qila boshlaydi. Chet eldagi bazalar yopiladi. Harbiylarning maosh-pensiyalari ham kamayishi kutilyapti.

Bundan buyon e’tibor ixcham va zamonaviy, muayyan tahdidni bartaraf eta oladigan tezkor, maxsus kuchlarni tayyorlashga qaratiladi.

Amerikaning yangi mudofaa strategiyasida Osiyo-Tinch okeani mintaqasi, xususan Xitoy va Shimoliy Koreyaga alohida ahamiyat qaratilgan. Yaqin Sharqdagi jarayonlar ham ko’zdan qochirilmaydi.

“Havo va dengiz kuchlari salohiyatini oshiramiz. Osiyo-Tinch okeani mintaqasida barqarorlikni ta’minlovchi kuch”, - deydi vazir Leon Panetta.

SEAL, Dengiz, yer va havoda harakatlanuvchi maxsus kuchlar

SEAL, Dengiz, yer va havoda harakatlanuvchi maxsus kuchlar

Harbiy tahlilchi Mett Irvin deydiki, 2001-yilning 11 sentyabri ketidan boshlanib ketgan urushlar natijasida piyoda askarlar soni haddan ziyod oshgan edi.

“Oradan 10 yil o’tib, tahdid darajasi ancha pasaygan. Hozirigi kunda Eron bilan aloqalar tarang. Yaqin Sharqda ertaga nima bo’lishini hech kim bilmaydi. Iroq va Afg’onistondan qo’shinlar olib chiqilganidan keyin ham regionda bazalar qoladi”, - deydi Irvin.

2012-yil AQShda saylov yili emasmi, prezidentning har bir qarori yaqindan kuzatilmoqda, ayniqsa harbiy sohadagi o’zgarishlarga kelganda. Muxolifat, ya’ni respublikachilar nazarida, Afg’onistonda urush davom etayotgan bir paytda Barak Obama Pentagon byudjetini kesayotgani xato qaror.

  • 16x9 Image

    Amerika Ovozi

    "Amerika Ovozi" - Vashingtonda asoslangan xalqaro teleradio, 45 tilda efirga chiqadi. O'zbek tilidagi ko'rsatuv va eshittirishlarda nafaqat xalqaro hayot balki siz yashayotgan jamiyatdagi muhim o'zgarishlar va masalalar yoritiladi. O'zbek xizmati AQSh poytaxtida olti kishilik tahririyatga va Markaziy Osiyo bo'ylab jamoatchi muxbirlarga ega.

XS
SM
MD
LG