Haj nima? Amerika masjidlarida yoshlar uchun maxsus darslar

  • Amerika Ovozi

"Dorul Hijra" masjidi, Virjiniya shtati

"Dorul Hijra" masjidi, Virjiniya shtati

Shu hafta Saudiya Arabistonida haj boshlanar ekan, Makkaga bir yarim milliondan ziyod musulmon yig'ilgan.

Amerikada esa yosh musulmonlar bu ziyorat haqida o'rganmoqda. Virjiniya shtatidagi "Dorul Hijra" masjidi xodimi Hafsa Abdulrahmon bolalarni dam olish kunlari to'plab, Makkada bo'ladigan jarayonni tasviriy ravishda ko'rsatishga harakat qildi. Xonani Makka deb faraz qilib, o'zlari tayyorlagan "Ka'ba"ning atrofida bir necha bor aylanishdi. Haqiqiy haj aslida 5-6 kunda ado etiladi.

Hafsa Abdurahmon, masjidda o'qituvchi

Hafsa Abdurahmon, masjidda o'qituvchi

"Ularga hajni his qilishga, yaxshiroq tasavvur etishga imkon beramiz. Ota-onalari ham kelib, bilmaganlarini o'rganib olishadi. Haj tarixi haqida ham hikoya qilamiz", - deydi Hafsa.

Hafsaning o'zi o'smirligida hajga borib kelgan.

"O'shandan keyin hayotim butunlay o'zgardi desam, mubolag'a bo'lmaydi. Amerikada o'ralgan musulmon ayol o'zini begonaday his qiladi. U yerda esa butun yer yuzidan to'plangan minglab bir xil kiyingan ayollar va erkaklarni ko'rganda buni his etmaysiz", - deydi Hafsa.

"Dorul Hijra" masjidi, Virjiniya shtati

"Dorul Hijra" masjidi, Virjiniya shtati

Masjid qoshidagi madrasaga qatnaydigan bolalar so'nggi bir necha dam olish kunlarida haj loyihasi ustida ishladi. Saudiya Arabistonining Mina shahrida bo'ladigan shaytonga tosh uloqtirish marosimini ham masjidda palatkali shaharcha maketini yasab, sahnalashtirdilar.

Hafsa Abdulrahmon bolalarning bir nechtasi haqiqiy hajda bo'lgan, deydi.

"Mana shunday mashg'ulotlar orqali hajga bormagan bolalar qalbida mehr bilan voyaga yetib, kelajakda pul to'plab, haqiqiy haj safarini ado etadi, degan umiddaman", - deydi muallima.

  • 16x9 Image

    Amerika Ovozi

    "Amerika Ovozi" - Vashingtonda asoslangan xalqaro teleradio, 45 tilda efirga chiqadi. O'zbek tilidagi ko'rsatuv va eshittirishlarda nafaqat xalqaro hayot balki siz yashayotgan jamiyatdagi muhim o'zgarishlar va masalalar yoritiladi. O'zbek xizmati AQSh poytaxtida olti kishilik tahririyatga va Markaziy Osiyo bo'ylab jamoatchi muxbirlarga ega.

XS
SM
MD
LG