AQSh hukumati va xususiy sektor "Islomiy davlat"ga qarshi kurashda birlashdi

  • Amerika Ovozi

Misrlik nasroniylar qatl oldidan. Ijtimoiy tarmoqlar orqali tarqatilgan videodan surat. 2015-yil fevrali.

Misrlik nasroniylar qatl oldidan. Ijtimoiy tarmoqlar orqali tarqatilgan videodan surat. 2015-yil fevrali.

AQSh xususiy sektordagi hamkorlari bilan birgalikda “Islomiy davlat” terror guruhining ijtimoiy tarmoqlardagi faoliyatiga qarshi kurashmoqda.

Ekstremistlar Iroq va Suriya jang maydonlarida chekinayotganiga qaramay, so’nggi paytlarda internetdagi faoliyatini jadallashtirgan. Internet orqali jihod mafkurasi targ’ib qilinmoqda, to’da yangi jangarilarni yollamoqda. Bu borada "Telegram" aloqa applikatsiyasi katta ahamiyat kasb etadi.

Obama ma’muriyatining so’nggi choralaridan biri "Google" kompaniyasi hamkorligida amalga oshirilmoqda. "YouTube" video platformasi orqali reklama algoritmlari yordamida “Islomiy davlat”ning yangi jangarilarni yollash urinishlariga chek qo’yilyapti.

Kelasi oyda ishga tushishi kutilayotgan kompyuter programmasi internet foydalanuvchilari muayyan so’zlarni izlaganda ishlay boshlaydi va ekranga reklamani chiqaradi. Maqsad – “Islomiy davlat” tarqatayotgan materiallarga qiziqish bildirgan foydalanuvchilarni nishonga olish, deydi ekspertlar.

Jangarilar ijtimoiy tarmoqlar orqali tarqatgan surat

Jangarilar ijtimoiy tarmoqlar orqali tarqatgan surat

Reklamada taniqli odamlar “Islomiy davlat”ni qoralovchi bayonotlar beradi.

“Fuqaro jurnalistlar, imomlar va ekstremistlar to’dasini tark etgan odamlar “Islomiy davlat” o’rtaga tashlayotgan savollarga javob bera oladi”, - deya tushuntiradi ushbu kompyuter programmasini ishlab chiqqan va loyihani boshqarayotgan “Jigsaw” kompaniyasidan Yasmin Grin. “Jigsaw” "Google" kompaniyasiga tegishli.

“Islomiy davlat”ga qarshi qaratilgan materiallarni uyg’unlashtiramiz”, - deydi internetda ekstremist mafkuraga qarshi kurashayotgan “Moonshoot CVE” texnologik kompaniya rahbari Ross Frenett.

AQSh hukumatiga ko’ra, bu loyihadan xususiy sektor bilan hamkorlik qilish naqadar muhimligi ayon bo’ldi. Manfaatlar hamohang, - deydi Davlat departamentidan Richard Stengel.

"Twitter" tarmog’i o’tgan yilda terror guruhlari bilan aloqada bo’lgan 360 ming foydalanuvchining hisoblarini yopgan edi.

Besh daqiqalik videoda "Islomiy davlat" jangarilari Musul muzeyidagi eksponatlarini buzayotgani ta'kidlanadi

Besh daqiqalik videoda "Islomiy davlat" jangarilari Musul muzeyidagi eksponatlarini buzayotgani ta'kidlanadi

“Islomiy davlat” o’z faoliyatini "Telegram" kabi kodli platformalarga ko’chirar ekan, AQSh rasmiylari texnologiya kompaniyalarining ekstremizmni targ’ib qilayotganlarni aniqlash strategiyasi ham o’zgarishi kerak, deydi.

“Jigsaw” kompaniyasi qo’llayotgan yangi uslub juda samarali, chunki u “Islomiy davlat”ni mana shu kichik makonda ovlamoqda”, - deydi Stengel.

AQSh ko’rayotgan choralar Yevropada ham aks-sado bermoqda. Ko’pgina mamlakatlar “Islomiy davlat” to’dasiga qarshi internetda kurashni jadallashtirgan.

“Masala ustida ishlayotgan olim va ekspertlar ko’p. Yevropa davlatlari hukumatlari tegishli choralar ko’ra boshlagan. Bu choralar AQSh hukumati manfaatlari bilan uyg’un ekan, ular bilan hamkorlik qilish lozim”, - deydi Kanadadagi Genotsid va inson huquqlari tadqiqotlar markazidan tahlilchi Mari Lamensh.

Biroq ko’rilayotgan choralar - xamir uchidan patir, hamon ilk bosqichda.

“Bu federal hukumat va sanoat yuz tutgan eng jiddiy muammo”, - deydi AQSh Ichki xavsizlik vazirligidan Jorj Selim.

  • 16x9 Image

    Amerika Ovozi

    "Amerika Ovozi" - Vashingtonda asoslangan xalqaro teleradio, 45 tilda efirga chiqadi. O'zbek tilidagi ko'rsatuv va eshittirishlarda nafaqat xalqaro hayot balki siz yashayotgan jamiyatdagi muhim o'zgarishlar va masalalar yoritiladi. O'zbek xizmati AQSh poytaxtida olti kishilik tahririyatga va Markaziy Osiyo bo'ylab jamoatchi muxbirlarga ega.

XS
SM
MD
LG