Xorijdagi o’zbeklar: O’zbekistonga sarmoya kiritishimiz gumon

  • Amerika Ovozi

Hukumatning ta’kidlashicha, chet el sarmoyasi oshib bormoqda; ishlab chiqarishni rejalashtirgan xorij kompaniyalari uchun imtiyozlar belgilangan, amaldorlarning tadbirkorlar faoliyatiga aralashishini cheklovchi qonunniy hujjatlar qabul qilinmoqda.

Hukumatning ta’kidlashicha, chet el sarmoyasi oshib bormoqda; ishlab chiqarishni rejalashtirgan xorij kompaniyalari uchun imtiyozlar belgilangan, amaldorlarning tadbirkorlar faoliyatiga aralashishini cheklovchi qonunniy hujjatlar qabul qilinmoqda.

Afg’onistondagi urushdan qochib Germanyada qo’nim topgan o’zbekistonlik tadbirkorlar Markaziy Osiyodan imkoniyat izlab keladi.

Ular tarixiy vatanda tijorat-savdo aloqalarini rivojlantirishni nafaqat daromad imkoni, balki burch sifatida ham ko’radi.

Biroq O`zbekistonda ish qilish oson emasligini bu tadbirkor ham bilib qolgan.

Asli afg’onistonlik savdogar Muhammad Sodiq 30 yildan buyon Germaniyada yashaydi. U bu davlatda prezident Islom Karimov bilan uchrashgan kam sonli o`zbeklardan.

“Taxminan 1990 yillarning boshi edi. Islom Karimov Germaniyaga safar bilan kelgan ekan. Islom aka o`zbeklar bormi, deb so`rabdi. Keyin bir necha kishi bordik, uchrashib gaplashdik. O`zbekiston mustaqil bo`lganidan, o`z bayrog`ini ko`targanidan, o`z rahbariga ega bo`lganidan xursandligimizni aytdik. Bu Islom akaga juda yoqdi. Kezin bizni O`zbekistonga taklif qildi, siz tashqaridasizlar, O`zbekistonga yordam beringlar, deb aytdi“, - deydi tadbirkor.

Muhammad Sodiqning aytishicha, prezident Karimovning gaplari chetdagi o’zbeklarni ruhlantirgan. Biroq bu uzoqqa cho`zilmagan. O`zbekistonda biznes qilayotgan xorijlik vatandoshlarga bosim kuchaygan, jumladan, Muhammad Sodiqqa ham.

“O`zbekistonga bordim. Qancha konteyner mol olib bordim. Xullas, mehmonxonada yotgan edim, orqamdan askar keldi. Sen nima qilding, nima qilyapsan deb. Men bu yerga ishlagani keldim, buni Islom akaning o`zi aytgan dedim. Xullas, meni kattasining oldiga olib bordi, men bilan amerikalik o`zbek ham bor edi. Kattasi bizga bu yerdan tez keting dedi. Nima desang, sizlar bu yerdan mol olasiz, joy olasiz, buni bizga keragi yo`q deydi. Joy olsak, uni orqamizga ortib ketmazmiz, shu yerda qoladi, dedik. Ko`rdikki, bo`lmadi. Ketdik, hamma narsa, molimiz ham, joyimiz ham qoldi”,- deydi u.

Afg`onistonlik boshqa o`zbekning aytishicha ham O`zbekistonda boshlangan biznesi zarar bilan yakunlangan, hozir u biznesini Xitoyda davom ettirmoqda.

“Xorijdagi o`zbeklar orasida boylar ko`p, ruxsat bo`lsa, har bir o`zbek bir million, ikki million olib kiradi. Hozir men o`z biznesimni Xitoyga ko`chirdim, ikkita zavod qurdim, xudoga shukur, qonunlari yaxshi”, - deydi u.

O`zbekiston hukumati xorijlik sarmoyadorlar uchun mamlakatda barcha sharoitlar yaratilganini, tadbirkorlar uchun qulay investitsiya muhiti shakllanganini ta`kidlab keladi.

Hukumatning ta’kidlashicha, chet el sarmoyasi oshib bormoqda; ishlab chiqarishni rejalashtirgan xorij kompaniyalari uchun imtiyozlar belgilangan, amaldorlarning tadbirkorlar faoliyatiga aralashishini cheklovchi qonunniy hujjatlar qabul qilinmoqda.

Biroq tijoratchilar deydiki, O`zbekistonda biznes yurgizish hamon qaltis, xatarli.

“Darrov biron gap topishadi. Bizning O`zbekistonga biron yomonlik qilish niyatimiz yo`q, lekin buning farqiga borishmaydi”, - deydi Muhammad Sodiq.

2011 yil O`zbekistonda kichik biznes va tadbirkorlik yili sifatida e`lon qilingan. Ular faoliyatini himoya qiluvchi, xususiy biznesga imtiyozlar beruvchi davlat dasturi qabul qilindi.

Biroq bu harakatlar xorijdagi sarmoyadorlarni, xususan, o`zbek tijoratchilarini vatanda ishlashga ko’ndirishi gumonday. Chunki ular O`zbekistonda ishlash qanday ekaniga o`zlarining achchiq tajribalari orqali guvoh bo`lishganini ta`kidlashadi.

  • 16x9 Image

    Amerika Ovozi

    "Amerika Ovozi" - Vashingtonda asoslangan xalqaro teleradio, 45 tilda efirga chiqadi. O'zbek tilidagi ko'rsatuv va eshittirishlarda nafaqat xalqaro hayot balki siz yashayotgan jamiyatdagi muhim o'zgarishlar va masalalar yoritiladi. O'zbek xizmati AQSh poytaxtida olti kishilik tahririyatga va Markaziy Osiyo bo'ylab jamoatchi muxbirlarga ega.

XS
SM
MD
LG