Shanba, 01-noyabr, 2014 Toshkent vaqti: 13:13

Siyosat

AQSh terrorga qarshi urushning yangi qoidalarini belgilamoqda

AQShning Pokistonda jangarilarga qarshi hujumlarda ishlatiladigan pilotsiz samolyoti
AQShning Pokistonda jangarilarga qarshi hujumlarda ishlatiladigan pilotsiz samolyoti
Amerika Ovozi
“Vashington Post” gazetasi AQSh hukumati terrorga qarshi urushga doir yangi siyosati bo’yicha ishni yakunlash arafasida ekani haqida xabar qilmoqda. Oq uy bu ma’lumotni hozircha tasdiqlamayapti, lekin inkor etgani ham yo’q. Maqolaga ko’ra, prezident Barak Obama hujjatni hali ko'rgani yo'q.

“Vashington Post” gazetasi bu ma’lumotni hukumatdagi manbalaridan olganiga ishora qilmoqda. Unga ko’ra, hujjat terrorchilikda gumon qilinayotgan odamlarni, jumladan xorijdagi Amerika fuqarolarini nishonga olish shartlari va huquqiy prinsiplarini belgilaydi.

Kim nishonga olinadi, ularning ro’yxati qanday tuziladi, terrorizmga aloqador AQSh fuqarolarini o’ldirish uchun qanday huquqiy asos keltiriladi, pilotsiz havo hujumlariga ruxsat olish uchun qaysi idoralar imzosini qo’yish kerak – bularning barchasini yangi qoidalar majmui belgilaydi.

Gazetaning bildirishicha, Pokistonda Markaziy razvedka boshqarmasi tomonidan al-Qoida va toliblarga qarshi amalga oshirilayotgan havo hujumlari bu qoidalardan ma’lum payt istisno bo’lib, 2014-yilgacha, AQSh qo’shinlari Afg’onistonni tark etgunga qadar davom etishi mumkin.

Aksil-terror qoidalar majmui matbuotda nashr etilmasligi mumkin, deydi gazeta.

Oq uy matbuot kotibi Jey Karni matbuot brifingida hujjat haqida ma’lumot berishdan bosh tortdi. Uning aytishicha, prezident Obama al-Qoida va unga aloqador guruhlarga qarshi kurashni davom ettirish rejasida qat’iy.

"Prezident Amerika va amerikaliklar hamda ittifoqchilarimiz xavfsizligini ta’minlash uchun barcha choralar ko’rilishi zarurligini aytdi. Biroq Obama bu ish qadriyatlarimiz va qonunlarimiz doirasida yuritilishi muhimligiga urg’u berdi", - dedi Karni.

2009-yilda Obama prezident bo’lganidan beri Qo’shma Shtatlar Pokiston va Yamanda pilotsiz samolyotlar vositasida jangarilarga qarshi havo hujumlarini oshirdi.

Mustaqil tahlilchi Metyu Eydning aytishicha, terrorga qarshi siyosat va qoidalar bir necha bor qayta ko’rib chiqilib, hukumatning tegishli doiralarida qizg’in munozaralarga sabab bo’lmoqda. Ekspert Pokistondagi havo hujumlariga doir qoidalardan chekinish bo’lmaydi, degan umidda.

"Uchuvchisiz samolyotlar AQSh hukumatining terrorchilarni topishda va yo’q qilishdagi eng asosiy qurolidir. Agar bu usul terrorga qarshi doktrinadan chiqarilsa, amaliyot muhim komponentdan ayriladi", - deydi ekspert.

Milliy razvedka xizmatining sobiq rahbari Dennis Bleyrning aytishicha, bu kabi maxfiy havo hujumlari Obama ma’muriyati uchun o’ziga yarasha muammolar tug’dirgan.

"Pokiston hukumatining terror tahdidlarini nazorat qilishi uzoq muddatda qiyinlashadi", - deydi u.

Tashqi aloqalar qo’mitasi tahlil markazining xodimi Mika Zenkoning aytishicha, agar yangi qoidalar Pokistondagi amaliyotlarni o’z ichiga olmasa, ulardan foyda bo’lmaydi.

"Qo’shma Shtatlar 2001-yil 11-sentabridan beri jang maydonidan tashqarida amalga oshirgan maxsus operatsiyalarining 85 foizi Pokistondagi amaliyotlarga to’g’ri keladi", - deydi Zenko.

Oq uy matbuot kotibi Jey Karnining aytishicha, al-Qoidaga qarshi erishilgan yutuqlarga qaramay unga aloqador guruhlar tahdidi hali ham mavjud. Terrorga qarshi siyosatning yangi bosqichida bu inobatga olinadi, deydi u.
Mazkur forum yopiq.
Izohlar
     
Mazkur forumda izohlar yo'q, siz boshlab bering
JavaScript ingiz o'chiq yoki Adobe Flash Player eskirgan. Yangisini mana bu yerdan olsangiz bo'ladi.
Otalar uyda, bola boqadi; onalar ishda - Today's dadsi
X
31.10.2014 22:03
Bugun ko'plab erkaklar uyda bola tarbiyasi bilan band, onalar esa ishlab pul topadi. Buning nimasi yomon, deya so'raydi "Amerika Ovozi" bilan gaplashgan amerikaliklar.

KUNDALIK ESHITTIRISH

JavaScript ingiz o'chiq yoki Adobe Flash Player eskirgan. Yangisini mana bu yerdan olsangiz bo'ladi.
Fotogalereya

Fotogalereya Quddus: arab va yahudiylar orasida to'qnashuvlar

Quddusdagi al-Aqsa masjidi bugun qisman ochiq. Isroil politsiyasi chorshanba kuni inshootni butunlay yopib qo'ygach, Falastin ma'muriyati buni urush e'lon qilishga qiyoslagan edi. Hududda hafta boshida ro'y bergan otishmada avval isroillik ruhoniy jarohatlangan; ketidan politsiya falastinlik bir shaxsni otib o'ldirgan edi. To'polon ko'tarilmasligi uchun musulmon va yahudiylar uchun muqaddas sanalgan masjid va uning atrofini vaqtincha to'sib qo'ydik, deydi Isroil huquq-tartibot xodimlari. 50 yoshgacha bo'lgan erkaklar hududga hamon yo'latilmayapti. G'azoda hukmron HAMAS va Isroil o'rtasida shu yil ro'y bergan ikki oylik urush ortidan yahudiy va falastinliklar munosabati hanuz tarang. Ixtilof 21 mingdan ziyod odam, asosan, g'azolik tinch aholini hayotdan olib ketgan edi.
Fotogalereya

Fotogalereya Burkina Fasoda xalq isyon ko'tardi, prezident ishdan ketdi

G'arbiy Afrikadagi davlat, Burkina Fasoda prezident Bleyz Kompraore 27 yillik boshqaruvdan keyin ishdan ketdi. Mamlakatda o'n minglab odamlar namoyishga chiqib, rahbarning iste'fosini talab qilayotgan edi. Chiqishlar qonli tus olgach, kecha armiya parlamentni tarqatib yuborib, muvaffaq hukumat tuzilishini ma'lum qilgan. 1987-yildan beri Burkina Fasoni boshqarayotgan Kompraore sal oldin parlamentda yangi qonunni olg'a surib, hokimiyatda uzoqroq qolishni ko'zlayotgan edi. Omma bundan norozi bo'lib isyon ko'targan. Sobiq rahbar hozir qayerda ekani, o'rniga kim tayinlanishi hali ma'lum emas. Ayrim manbalarda general Luame Loug vaqtli hukumatga bosh bo'lishi mumkin deyilmoqda. Kecha, payshanba kuni poytaxt Uagaduguda odamlar parlamentga o't qo'yib, boshqa davlat idoralariga bostirib kirgan. Politsiyaning aytishicha, o'lganlar va yaradorlar bor. Xalqni tinchlantirish uchun rasmiylar parlamentda olg'a surilgan konstitutsion o'zgarishlarni va bir necha soat oldin e'lon qilingan favqulodda holatni bekor qildi. Birlashgan Millatlar Tashkiloti Bosh kotibi Pan Gi Mun G'arbiy Afrikadagi bu davlatda vaziyatni xavotir bilan kuzatayapmiz, deydi. Bosh kotib tomonlarni tinchlanishga va zo'ravonlikdan tiyilishga chaqirmoqda.
Fotogalereya

Fotogalereya Peshmerga kuchlari Kobaniga yetib keldi

Iroq Kurdistonidan peshmerga jangchilarining bir qismi Suriyaning Kobani shahriga yetib borgan. Ular "Islomiy davlat" jangari guruhiga qarshi kurashda mahalliy kurdlar va xalqaro koalitsiyaga yordam beradi.
Fotogalereya

Fotogalereya Gavayi vulqoni aholi turar joylariga yetib keldi

Gavayida otilib chiqqan vulqon lavalari bir necha hafta o'tib Paxoa shaharchasiga yetib keldi. Sekin harakatlanayotgan lava "daryosi" yo'lda uchragan har qanday narsani kuydirib kulga aylantirmoqda. Shaharcha aholisi xavfsiz joyga evakuatsiya qilingan.
Fotogalereya

Fotogalereya Ebolaga qarshi global kurash

Dunyo bo'ylab Ebolaga qarshi kurash choralari kuchaytirilmoqda. Eboladan ogohlik oyligi doirasida turli mamlakatlarda xavfli kasallikka qarshi tayyorgarlik mashg'ulotlari o'tkazilmoqda.
Fotogalereya

Fotogalereya Afg'onistondagi missiya nihoyasiga yetayapti

Afg'onistonning Hilmand viloyatidagi yirik harbiy baza mahalliy armiya nazoratiga o'tdi. AQSh va Britaniya qo'shinlari missiyani yakunlab, o'lkani tark etishga hozirlik ko'rmoqda. 2015-yilda Afg'onistonda 12 ming xorijiy askar qoladi.
Fotogalereya

Fotogalereya Suriya va Iroq

G'arb qo'llab-quvvatlovini olgan kurd jangchilari Turkiya orqali Suriyaga 1300 safdoshini jo'natishga hozirlik ko'rayapti. Iroqda va Suriyada janglar davom etmoqda.
Fotogalereya

Fotogalereya Turkiya kurdlari qo'shni davlatdagi urushda o'lgan elatdoshlariga motam tutmoqda

Suriyaning Kobani shahri bir necha kundan beri jang maydoni. "Islomiy davlat" bilan qonli urush ketmoqda.
Fotogalereya

Fotogalereya Kanada parlamentida otishma, Ottavadan suratlar

Kanada poytaxtida urush qahramonlariga qo'yilgan yodgorlik oldida turgan askar otib ketilgan. Bu inshoot yaqinidagi parlament binosi ham xavf ostida degan ogohlantirishdan keyin evakuatsiya ishlari boshlangan. Harbiy soqchini nishonga olgan shaxs parlament tomon qochdi, deydi guvohlar. Imoratdan o'q ovozlari eshitilgan. Askarni otgan odam politsiya o'qidan o'lgan. Yaralangan askar ham kasalxonada jon bergan.

Interaktiv

SAYTGA KIRISHNING XAVFSIZ YO’LI