Iroq qurolli kuchlari shahar va qishloqlarni mutaassib kuchlardan tozalash operatsiyasini davom ettirmoqda. Iroq va Shom islomiy davlati degan harakat a’zolarini ayni damda Tikrit shahridan quvib chiqarish uchun janglar avjida. Tikrit, ma’lumki, sobiq va marhum rahbar Saddam Husaynning ona shahri.
Kecha AQSh havo kuchlari yordamida Mosul suv ombori ustidan nazorat yana Iroq hukumatiga o’tgan. Sunniy ekstremistlar u yerni bosib olgan edi. Suv ochilgan taqdirda butun mintaqa vayron bo’lgan, minglab odamlar o’lgan bo’lar edi.
Amerika rahbari Barak Obama nazarida Iroq armiyasi, kurd jangchilari bilan hamkorlikda va Pentagon ko’magi bilan mamlakatni islomiy kuchlardan xalos etish uchun jon-jahdi bilan kurashmoqda va yutuqqa erishmoqda. Biroq, deydi u, barqarorlikni ta’minlash uchun markaziy hukumat adolatli va uzoqni ko’zlagan siyosat olib borishi zarur. Mazhablararo nifoqlarga barham berish kerak. Siyosatda mazhabni chetga surish zarur. Aks holda, deydi Obama, Iroqda tinchlik bo’lmaydi.
BMT qochqinlar agentligi Iroqda boshpanasiz qolgan yarim million odamga ko’mak ko’rsatmoqda. Chodirlar, oziq-ovqat, dori-darmon, suv va boshqa zarur mahsulotlar yetkaziladi.
O’tgan oylar ichida bir milliondan oshiq aholi urushlardan jabr ko’rgan.
AQSh havo kuchlari 15 obyektga zarba bergan. Hammasi Iroq va Shom islomiy davlatiga qarashli joylar, deydi harbiylar.
