Breaking News

Qirg'iziston janubida yangi teleradio ijodkorlari bilan suhbat


http://www.yntymak.kg/
http://www.yntymak.kg/
Qirg’iziston janubida “Intimoq”, ya’ni “Birdamlik” nomli yangi teleradiokompaniya ish boshladi. Ommaviy axborot vositasi AQShning “Internews” tashkiloti va Qirg'iziston hukumati hamkorligi mahsulidir.

Qirg'izistonda yangi radio va telekanal xodimlari bilan suhbat/Ulug'bek Sokin
Iltimos, kuting...

No media source currently available

0:00 0:04:01 0:00
Yuklab oling

“Intimoq”ning radiodasturlari janubda ikki oydan beri efirga chiqmoqda. Kelasi yil ko’rsatuvlar boshlanishi ko’zda tutilgan. Hozir tayyorgarlik ishlari ketmoqda. Kompaniya rahbari Qarmanbek Quluyevning aytishicha, eshittirishlar FM to’lqinlarida chiqayapti.

“Hozircha jiddiy natijalar haqida gapirishga erta bo’lsa kerak. Aytaylik, kechki dasturlarimizda ilk kunlar yuzga yaqin sms-lar kelgan bo’lsa, hozir mingdan ziyod qo’ng’iroqlar tushyapti. Bu degani tinglovchilar soni kamida 30 mingga yetib qoldi. Odatdagi, ya’ni klassik eshittirishlardan tashqari biz bir necha yangiliklarni qo’llamoqdamiz. Masalan, “Normalayzer” degan dasturni efirga uzatayapmiz. Unda muxbirlarimiz hafta mobaynida ijtimoiy muammolarni o’rganadi va o’z qahramonlari bilan birga ularni ommaga yetkazadi”, - deydi Quluyev.

“Intimoq”ning o’zgachaligi ko’p tilde chiqishidir. Eshittirish va ko’rsatuvlar qirg’iz, rus va o’zbekchada.

2010-yilgi O’sh voqealaridan so’ng hududda o’zbekzabon ommaviy axborot vositalari keskin kamayib ketgan. Loyiha mualliflari deydiki, yangi kanal vujudga kelgan bo’shliqni bir qadar to’ldirdi.

“Ko’p tillik dasturlarga kelsak, bu o’rinda yechilishi lozim bo’lgan qator masalalar bor. Asosiy muammo kadrlarning malakasi. Bizning oliy o’quv yurtlarimiz bu masalada oqsayotgani avvaldan aytib kelinadi. Ikkinchidan, o’zbekzabon jurnalistlarning yetishmasligi ham ta’sir ko’rsatmoqda. Qirg’iz va rusiyzabon hamkasblar ham ma’lum cho’qqiga yetgach, yaxshi sharoit orqasidan poytaxt Bishkekka ketib qolmoqda”, - deydi suhbatdosh.

Hozircha yangi teleradiokompaniyaning o’zbek va rus tillaridagi eshittirishlari qisqa yangiliklar turkumi va musiqalar bilan cheklanadi.

Qirg’izchadan tarjima qilganda “intimoq” “birdamlik” degani. Yangi teleradiokanal tashkilotchilari ham aynan shu maqsadni ko’zlaydi. Bunga erishish yo’lida nimalar qilinmoqda va qilinadi?

“Bunga yetishning oddiy yo’llari bor. Birinchidan, tolerantlikni shakllantirish, ya’ni bir-biriga sabrliroq bo’lish. Bu o’rinda biz turli ijtimoiy tabaqalar munosabatlarini ko’rsatishga harakat qilamiz. Ayni paytda davlatning elga aytadigan gapi, elning davlatga aytadigan gapini yetkazishga hissa qo’shamiz. Millatlararo munosabatlarda ham biz birinchi navbatda bir-birini tushunish va eshitish g’oyasini olg’a suramiz”, - deydi Quluyev.

Yangi teleradiokompaniya kelasi yildan ko’rsatuvlarni boshlashni rejalagan. Aytish joiz, “Intimoq”ni Qirg’izistonning janubiy uch viloyatida, shuningdek, qo’shni O’zbekistonning chegara tumanlarida ko’rish va tinglash mumkin bo’ladi.

Kelajakda ijodiy jamoa Markaziy Osiyo media bozoriga chiqishni niyat qilgan. Hozir ayrim xorijiy ommaviy axborot vositalari bilan mahsulot almashish borasida muzokaralar ketayotgani aytilmoqda.
XS
SM
MD
LG