"AMERIKA OVOZI" O'ZBEK XIZMATI XODIMLARI

Javdat Sayhon "Amerika Ovozi" O'zbek xizmati mudiri. Teleradio sohasida 1985-yildan beri ishlaydi. Ota-bobolari aslida Farg'ona vodiysidan, ammo o'zi Turkiyada tug'ilib katta bo'lgan. Istanbul Davlat Universiteti muhandislik fakultetini bitirgan. Keyinchalik Vashingtondagi Amerika Universitetida (American University) tasviriy media bo'yicha magistrlik darajasini olgan. Avval Yaqin Sharq va Markaziy Osiyo bo'limi, undan oldin esa O'zbek xizmati bosh prodyuseri bo'lgan.

Navbahor Imamova Oq uy rasmiysi Selest Vollander bilan muloqotda, 2014

Navbahor Imamova Oq uy rasmiysi Selest Vollander bilan muloqotda, 2014

Navbahor Imamova "Amerika Manzaralari" turkumidagi ilk teledasturlar muallifi. TV va radio diktor, prodyuser. "Amerika Ovozi"da 2002-yildan beri ishlaydi. Jurnalistik faoliyatini 1996-yilda O'zbekiston radiosining "Xalqaro hayot" redaksiyasida boshlagan. Jahon Tillar Universiteti Xalqaro jurnalistika fakultetida dars bergan. Ommaviy axborot vositalari bo'yicha bakalavrlikni Hindistonning Maysur Universitetidan (University of Mysore), magistrlikni esa AQShning Bol Davlat Universitetidan (Ball State University) olgan. Toshkent viloyati Bo'stonliq tumani Qo'shqo'rg'on qishlog'ida ziyoli oilasida ulg'aygan.

Odil Ruzaliev O'zbek xizmatiga 2005-yilda kelgan. Diktor va prodyuser. AQShning Tafts Universitetida (Tufts University) xalqaro aloqalar sohasida magistrlik darajasini olgan. Ungacha O'zbekiston TV 1-kanalida ingliz tilidagi yangiliklar – FCN (First Channel News) – ko'rsatuvining muallif-boshlovchisi edi. "Axborot" dasturida mehnat qilgan. Odil ko'p yillar AQShning Toshkentdagi elchixonasi axborot bo'limida ishlagan. O'zbek, ingliz va rus tillarida chop etilgan qator maqolalar muallifi. Farg'ona shahrida tug'ilgan.

XS
SM
MD
LG