Yevropa Ittifoqining taraqqiyot ishlari bo'yicha komissari Andris Piyebalgs O'zbekiston va Qirg'izistonga safar qilmoqda. Hamkorlik, yordam va islohot dasturlari muhokama qilinadi.
Ittifoq Qirg'izistonda oziq-ovqat ta'minoti uchun 2 million yevro ajratmoqda. Piyebalgs blok moliyalashtirayotgan dasturlarni ko'zdan kechirib, ular samarasini o'rganadi.
Bugun, shuningdek, Almatida Yevropada Xavfsizlik va Hamkorlik Tashkilotining demokratik institutlar va inson huquqlari bo'yicha idorasi Markaziy Osiyoning besh davlati rasmiylari, qonun chiqaruvchilari, ombudsmen va fuqarolik jamiyati vakillari uchun seminar o'tkazmoqda. Unda hukumat va nodavlat tashkilotlari o'rtasida hamkorlikni yaxshilash yo'llari ko'rib chiqilmoqda.
"Nodavlat tashkilotlari inson huquqlari muammolarini ko'tarishda, demokratiya va qonun ustuvorligini targ'ib etishda muhim rol o'ynaydi, biroq buning uchun hukumatlar ularga tegishli shart-sharoitlar yaratib berishi lozim", deydi Yevropa tashkiloti vakilasi Snejana Bokulich.
