Ramazon oyida musulmon yurtlar notinch

Ro'za oyi boshlanar ekan, Afg'onistonda ketma-ket portlashlar. 100 ga yaqin odam o'ldi. Iroqda ham shu singari terror xurujlari. Qariyb 30 kishi halok bo'ldi. Filippinda musulmonlar yashovchi hududlar beqaror. Dunyo bo'ylab, ro'zaning ilk kunlarida 227 kishining yostig'i quridi.

Aslida Ramazon barqarorlik va osoyishtalik davri bo'lishi kerak. Insonlar zo'ravonlikdan tiyilib, ibodatga berilib, nafsini va moddiy talablarini chetga surishi lozim.

Suriya, Afg'oniston, Iroq, qolaversa butun jahon bo'ylab hukumatlar bu davrda to'polon va notinchliklar oshadi, deya xavotirda. Xavfsizlik choralari kuchaytirilgan. Yillar davomida shu odat bo'ldi, deydi rasmiylar, ro'za oyida terrorchilar quturadi.

"Islomiy davlat" o'z tarafdorlarini aynan shu oyda xurujlar qilishga undab, narigi dunyoda mukofoti oliy bo'ladi, deya bong urmoqda.

“Odamlarni uyida, bozorlarda, ko'cha va jamoat joylarida nishonga olavering. Ular begunoh deya o'zingizni aldamang. Hammasini o'ldiring", - deya chaqirmoqda terror guruhi o'z ijtimoiy tarmoqlarida.

Yashar J'olak, Turkiyaning Vashingtondagi elchixonasida diniy aloqalar bo'yicha diplomat deydiki, "Islomiy davlat" bu chaqiriqlari bilan o'zining islomdan naqadar uzoqligini isbotlamoqda.

“Islom yilning hech bir davrida insonlarni boshqalarni o'ldirishga chorlamaydi. Islom tinchlik demakdir", - deydi diplomat.

"Islomiy davlat" va Tolibon musulmonlarni zo'ravonlikka undayotgani bejiz emas, deydi Tehrondan tahlilchi Said Javod Tog'ivirod, chunki bunday paytlarda yoshlarni ruhlantirish osondek tuyuladi. Ularni iymon tomon emas, qabihlik tomon yetaklash osonroq deb o'ylashadi. Terrorchilarning mentaliteti shunday, deydi Tog'ivirod.

Ramazon oyida odamlar ko'p to'planadi, mehmondorchilik va tadbirlar tez-tez kuzatiladi. Yoppasiga nishonga olishni maqsad qilgan jangarilar bu fursatdan foydalanishga urinadi.

“Hech bir din urushni yoqlamaydi", - deydi amerikalik siyosiy arbob Maykl Rubin. "Terrorchilar - qotillar, kallakesarlar. Ular vahshiylikdan boshqa narsani bilmaydi, bu aniq".

O'tgan yii ro'za oyida AQSh, Livan, Turkiya, Bangladesh, Iroq va Saudiya Arabistonida yuzlab odamlar terror hujumlarida nobud bo'lgan edi.