Breaking News

Eron ikki kunlik harbiy mashg'ulot boshladi


Eronning yangi harbiy kemasi mashg'ulot paytida, 2021-yil, 13-yanvar

Eron dengiz floti bugun Ummon qo’ltig’ida qisqa masofaga uchadigan raketa sinovlarini boshladi. Shuningdek, mamlakat telekanali xabariga ko’ra, Eronning eng katta harbiy kemasi taqdimoti o’tkazilgan.

Ikki kunlik harbiy mashg’ulotlar yadro dasturi yuzasidan AQSh va Eron o’rtasida ziddiyatlar kuchaygan bir paytda bo’lib o’tmoqda. Mashqlar qo’ltiqning janubi-sharqiy hududida olib borilyapti. Unda Eronda ishlab chiqarilgan ikkita yangi kema ishtirok etmoqda: raketa otishga mo’ljallangan “Zirh” kemasi hamda mamlakatning “Makran” deb atalgan eng katta yangi harbiy suv transporti. Vertolyot uchirish maydoniga ega “Makran” kemasidan logistika transporti sifatida foydalanish ko’zlanmoqda.

So’nggi haftalarda Eron harbiy mashg’ulotlari sonini oshirgan.

Shanba kuni Inqilobiy gvardiya kuchlari Fors ko’rfazida harbiy dengiz paradini o’tkazdi. Bir hafta avval esa mamlakat bo’ylab harbiy dronlarning ulkan namoyishi bo’lib o’tdi.

Eron yangi harbiy muvaffaqiyatlari haqida tez-tez e’lon qilib turadi, ammo bu xabarlarni mustaqil tasdiqlash imkoni yo’q.

Kecha AQSh Davlat kotibi Mayk Pompeo Eronni “Al-Qoida” terror tarmog’i bilan maxfiy aloqaga ega ekanlikda ayblab, mamlakatning bir qator yetakchi rasmiylariga yangi sanksiyalar joriy qildi.

Eron bu ayblovlarni inkor etadi.

  • 16x9 Image

    Amerika Ovozi

    "Amerika Ovozi" - Vashingtonda asoslangan xalqaro teleradio, 45 tilda efirga chiqadi. O'zbek tilidagi ko'rsatuv va eshittirishlarda nafaqat xalqaro hayot balki siz yashayotgan jamiyatdagi muhim o'zgarishlar va masalalar yoritiladi. O'zbek xizmati AQSh poytaxtida olti kishilik tahririyatga va Markaziy Osiyo bo'ylab jamoatchi muxbirlarga ega.

Facebook Forum

XS
SM
MD
LG