BMT Qochqinlar agentligi Termiz orqali Afg'onistonga insonparvarlik yordami uzatdi. O'zbekiston hozirda bunday ko'mak uchun o'z hududini ochib qo'ygan. Termiz Kargo markazi bu borada xizmat ko'rsatmoqda, deya bildiradi BMT rasmiylari.
Bu safargi yordam 40 tonna bo'lib, uy-ro'zg'or anjomlaridan iborat. Yuk o'tgan ikki oy mobaynida Termizga havo yo'llari orqali keltirilgan. Uning Afg'onistonga qachon kirishi Kobuldagi rahbarlarning irodasiga bog'liq.
“Biz O'zbekiston hukumatining bu jarayonlarni quvvatlayotganidan minnatdormiz. Millionlab afg'onlar oziq-ovqat taqchilligidan qiynalmoqda. Qahraton qishdan eson-omon chiqishlari uchun va gumanitar inqirozning oldini olish uchun favqullodda madad ko'rsatishimiz zarur", - deya qayd etadi Qochqinlar agentligi vakili Frank Remus.
Amerika Ovozi yaqinda Termizda bo'lib, maxsus ko'rsatuv berdi, chegaradagi vaziyatni o'rgandi, Kargo markazida bo'ldi va Surxondaryodagi afg'onlar bilan suhbatlashdi.
