Isroil Bosh vaziri Benyamin Netanyaxuning ta’kidlashicha, G’azo sektorida hukmron XAMAS guruhi yo’q qilinadi. Isroil G’azo bilan chegarada 300 ming sonli qo’shin jamlab, 2 milliondan oshiq aholi yashovchi anklavga kirishga hozirlanmoqda.
Yaqinda tuzilgan koalitsion hukumat ilk bor favqulodda majlisini o’tkazdi, unda muxolif qonunchi Benni Gantz ham qatnashgan. Barcha rahbarlar birdam bo’lib, bir yoqadan bosh chiqarib tunu-kun ishlamoqda, deydi Netanyaxu.
Yaqin Sharq bo’ylab safar qilayotgan AQSh Davlat kotibi Entoni Blinken 16-oktabr kuni yana Isroilda to’xtab o’tadi. Bosh diplomat hafta davomida bir necha arab davlatlariga tashrif buyurib, mojaro kengayishining oldini olish haqida gaplashgan.
Isroil G’azo aholisini janubiy hududlarga ko’chib o'ting, deya undashda davom etmoqda. XAMAS esa bu chaqiriqni propaganda deya ta’riflab, odamlarni o’z uyida qolishga undayapti.
G’azo bir necha kundan beri qamalda. BMT sektorda gumanitar vaziyat nihoyatda og’ir deya bong urmoqda. Suv tozalash inshootlarida yoqilg’i tugagani bois ikki milliondan ziyod aholi iflos suv ichishga majbur, deydi tashkilot rasmiylari.
Ammo Oq uy rasmiysi Jeyk Sallivan “CNN” kanali bilan intervyuda Isroil G’azo janubida suv ta’minotini tiklaganini ma’lum qildi.
XAMASning Isroilga bir hafta oldingi hujumlarida 29 amerikalik halok bo’lgan, yana 15 nafaridan darak yo’q. XAMAS asirlikda saqlayotgan fuqarolarimizni qutqarish – ustuvor vazifa, dedi Sallivan.
Garovdagilar qayerda saqlanayotgani, ahvoli qanday ekani noma’lum. AQSh rasmiylari ularning ayrimlari o’ldirilgan bo’lishi mumkinligini tan oladi. Amerikaliklarni ozod etish bo’yicha uchinchi davlatlar bilan muzokaralar olib borilmoqda.
Vashington G’azodagi amerikaliklarni Rafah o’tish punkti orqali Misrga o’tkazishni so’ramoqda, ammo Qohira bunga ijozat bermagan. Misr evakuatsiya bo’yicha juda ko’p so’rovlar tushayotgani, bir mamlakatni boshqalaridan ustun qo’ya olmasligini bildirdi.
Qohira qo’yayotgan bir shart shuki, agar xorijiy fuqarolar G’azodan Misrga o’tadigan bo’lsa, Misrda to’planib qolgan gumanitar yordam yuklarini ham G’azoga olib kirish uchun imkoniyat yaratish kerak.
Davlat kotibi Entoni Blinken 15-oktabr kuni Qohirada Prezident Abdul Fattoh al-Sissi bilan masalani muhokama qilgan. Sissi fikricha, Isroilning XAMAS hujumiga javobi o’zini himoya qilishdan – G’azo aholisini ommaviy jazoga tortishga aylandi.
Blinken Saudiya Arabistonida ham muzokaralar olib bordi. Valiahd shahzoda Muhammad bin Salmon uchrashuvda urushniu to’xtatish va G’azo blokadasini bekor qilish zarurligini ta’kidlagan.
Bu orada, Isroilning kutilayotgan harbiy amaliyoti oldidan G’azoda gumanitar inqiroz kuchaymoqda. Minglab odam G’azo janubiga yo’l olgan. G’azo shahridagi “Shifo” kasalxonasida bemorlardan tashqari yana kamida 35 ming kishi jon saqlamoqda.
Isroil bosh vaziri bilan telefon suhbatda Prezident Jo Bayden AQSh Isroilni qo’llab-quvvatlashini aytgan. So’nggi kunarda AQShning bir necha kemalari O’rta dengizga yetib bordi.
“Hududda qo’shinlar soni ortishi AQSh Isroil xavfsizligiga sodiqligini, urushni avj oldirishga urinayotgan har qanday davlat yoki boshqa ishtirokchilarni to’xtatish qarorimizni ko’rsatadi”, - deydi AQSh Mudofaa vaziri Lloyd Ostin.
Rossiya BMT Xavfsizlik Kengashida Isroil-XAMAS urushida sulh e’lon qilish, tinch aholiga qarshi zo’ravonlik va terrorchilik harakatlarini qoralaydigan rezolyutsiyani ovozga qo’yishni so’ramoqda.
15-oktabr holatiga ko’ra, Isroilning havo zarbalaridan G’azoda halok bo’lganlar 2450 ga yetdi. Isroilda 7-oktabr kungi XAMAS hujumida o’lganlar 1400 kishini tashkil etmoqda, shundan 289 nafari askarlar. Yana 126 kishini XAMAS garovga olgan.
Isroil-XAMAS: Urush dahshati
