“Save the Children” - “Bolalarni asrang” xalqaro nohukumat tashkilotining O`zbekistondagi vakolatxonasi rahbari bolalar ta`limiga oid hisobot yuzasidan Adliya vazirligiga chaqirilgan. Ma`lumotlarga ko`ra, rasmiy idoralar tashkilot faoliyatini to`xtatish taraddudini ko`rmoqda.
Tashkilot hisobotida O`zbekistonda maktab yoshidagi bolalarning 19 foizga yaqini ta’lim olish imkoniyatidan mahrum ekanligi haqida so`z boradi.
Bu ma`lumotlar Xalq ta`limi vazirligi tomonidan rad etilgan va tashkilot vakillari O`zbekistondagi ta`lim ahvolidan bexabarlikda ayblangan edi.
“Press-uz. info” agentligining yozishicha, vakolatxona rahbari Terri Li Kornelison hisobotda ko`rsatilgan ma`lumotlarga oydinlik kiritish uchun markaziy idora bilan bog’lanish zarurligini ta’kidlagan.
O`zbekistonda ta'lim sohasi, jumladan maktab yoshidagi bolalarning ta’lim olish imkoniyatlari va darajalarini o`rganuvchi mustaqil tashkilot yoq.
Kuzatuvchilar va huquq himoyachilariga ko`ra, O`zbekiston maktablaridagi asosiy muammo ko`p jihatdan ota- onalarning iqtisodiy qiyinchiliklari bilan bo`gliq. Bundan tashqari, deyishadi ular, O`zbekiston bolalar huquqini buzishda davom etayotgan davlatlardan biri. Maktab o`quvchilari majburiy mehnatga jalb etiladi.
Jizzaxlik huquq himoyachisi Ziyodulla Razzoqovning aytishicha, maktab o`quvchilarini paxta terimiga chiqarish sentyabr oyidanoq boshlangan.
“15 sentyabrdan maktab o`quvchilari va talabalar ommaviy tarzda paxta terimiga olib chiqilgan. Terim bir-ikki oy davom etadi. Shundan song ular yana ta’lim olish uchun maktabga qaytishlari mumkin”, - deydi Razzoqov.
Kuzatuvchilar nazarida “Bolalarni Asrang” tashkilotiga nisbatan boshlangan bosimlar O’zbekistonda xalqaro tashkilotlar faoliyatini tugatish siyosati davomi etayotganidan darak beradi.
