O’zbekistonda prezidentlikka nomzodlarning saylov dasturlari e’lon qilingan. Lekin kuzatuvchilar nazarida bu dasturlarda asosan umumiy gaplar bilan cheklanmoqda. Ularga aniqlik yetishmaydi.
Markaziy saylov komissiyasi ma’lumotiga ko`ra, saylovoldi targ`ibot kampaniyasi uchun o`zbek, rus va qoraqalpoq tilida reklamalar tayyorlangan. Nomzodlarning ommaviy axborot vositalaridan foydalanish tartibi belgilangan.
O`tgan hafta O`zbekiston televideniyesi prezidentlikka nomzod, amaldagi prezident Islom Karimovning saylov dasturi haqidagi ko`rsatuvni namoyish etdi.
Karimov saylov dasturida 10 yo`nalishni belgilaydi.
Bular bozor-mulk munosabatlari, tadbirkorlikni qo`llab-quvvatlash, imtiyozlar yaratish, fuqarolik institutlarini shakllantirish, ommaviy axborot vositalari erkinligi, sud mustaqilligini ta`minlash va hokazo.
“Jamiyatimizni yangilash va isloh qilishning hozirgi bosqichida aholimizning ijtimoiy-siyosiy faolligini oshirish, ularning xohish irodasini ifoda etishda, bugun zamonning o`zi talab qiladigan bu muhim vazifalarni bajarishda, fuqarolik-nodavlat institutlarini shakllantirish, fuqarolarning huquqiy erkinliklarini, ommaviy axborot vositalari erkinligini ta`minlash, siyosiy partiyalarning roli va ahamiyatini kuchaytirish, ularning huqua va vakolatlarini kengaytirish masalalari katta o`rin tutishini hammamiz tushinib, anglab olmoqdamiz”, - deb ta’kidlabdi Islom Karimov televideniye orqali chiqishida.
Ekspert Toshpo’lat Yo`ldoshev fikriga ko`ra, Islom Karimov saylov dasturida umumiy gaplar ko’p, aniq o`zgarishlar haqida gap yo`q.
“Prezidentning saylov platformasida siyosatda tub o`zgarishlar qilishga ishoraning o`zi yo`q”, - deydi u.
Farg`onalik faollardan biri Ma`murjon Qosimov saylov kampaniyasidan afsusda.
Gruziyada muxolifat namoyishlaridan so`ng prezident muddatidan avval saylovlarni belgiladi, o`zi vaqtinchalik iste’foga chiqib, barcha bilan teng ravishda kurasha boshladi deydi u.
“Men sevgan O`zbekistonimda ham sevimli prezidentim hech bo`lmaganda vaqtinchalik o`z vakolatlarini topshirib, boshqalar bilan teng ravishda kurashib, o`z vakolatlarini qaytarib olganda edi, men faxrlanar edim. O’zi prezident bo`lib tursa, saylov natijasi oldindan ayon-ku, degan gaplar ko`paygan”, - deydi Ma`murjon Qosimov.
Ma`murjon Qosimov fikricha president sasturidagi yo’nalishlarga to’liq amal qilinganida edi, hozirgi prezidentni, Oliy Majlisni konstruktiv tanqid qilish mumkin bo’lganda edi, mustaqil matbuot borligiga ishonish mumkin bo`lar edi.
Tahlilchi Toshpo'lat Yo`ldoshev prezidentning o`zi sudyalarni lavozimga tayinlaganidan keyin sud mustaqilligi haqida gap bo`lishi mumkin emas deydi.
“Sudlar faqat Prezident devonidan tushadigan buyruqlarga itoat qilishga majbur”, - deydi u.
Kuzatuvchilarning so’zlariga qaraganda, nomzodlarning saylov dasturlarida deyarli farq yo`q. Hammasida O`zbekiston prezidenti rahbarligidagi yutuqlar qayd etiladi. Saylovchilarga qanday o`zgarishlar taklif qilinayotgani, hozirgi hukumatning qanday xatolarga yo`l qo`ygani haqida hech narsa deyilmaydi.