Kobulda xalqaro tashkilot xodimlari yashaydigan binoga hujum

Kobulda toliblar xalqaro tashkilot xodimlari yashaydigan imoratga hujum qilib, kamida ikki odam, jumladan, yosh bola halok bo’lgan. Bino yonida avvaliga bir kishi o’zini portlatgan, keyin otishma boshlangan.

AQShda asoslangan nodavlat tashkiloti “Land for Peace” Afg’onistonni minalardan tozalashda yordam beradi. Kobuldagi binoda mana shu guruh odamlari turgan.

Tashkilot rasmiylarining “Amerika ovozi”ga aytishicha, hujum natijasida olti odam imoratda qamal holatida. Uch nafarining holi nima kechgan, noma’lum.

5-aprelda Afg’onistonda prezident saylovlari o’tadi. Oxirgi bir haftada Kobulda toliblar uch bora qonli hujumlarni amalga oshirgan.

Toliblar saylovga halaqit berishini aytib keladi. Xalqaro qo’shinlari mamlakatdan ketayotgan bir pallada Afg’oniston uchun bu galgi saylov barqarorlik uchun sinov bo’ladi.

Afg’on rasmiylarining aytishicha, juma kungi hamladan 20 xorijlik va mahalliy xodim omon qolgan. Toliblarning ta’kidlashicha, bino cherkov vazifasini o’tagan.