Breaking News

Afg'onistonda saylov kampaniyasiga hujumda 22 odam o'lgan


Afg'onistonning Taxor viloyatida portlash

13-oktabr kuni Afg'onistonning shimoli-sharqida joylashgan Taxor viloyatida bo'lajak parlament saylovlariga bag'ishlangan namoyish paytida mototsiklga o'rnatilgan bomba portlab, kamida 22 odam o'lgan. Viloyat politsiya boshqarmasi matbuot kotibi Xalil Asirning aytishicha, 32 kishi jarohat olgan.

Rustaq tumanida sodir bo'lgan voqeada xavfsizlik xodimlari va oddiy odamlar nobud bo'lgan. Namoyishchilar parlament deputatligiga nomzod Nazifa Yusufiy Bek chiqishini tomosha qilish uchun to'plangan edi, portlash paytida nomzodning o'zi bo'lmagan.

Bu joriy oyda saylov kampaniyasini nishonga olgan uchinchi xuruj. 2-oktabr kuni Nangarhor viloyatidagi hujumda 13 odam o'lgan, 40 dan ziyodi jarohatlangan edi. Shundan bir necha kun o'tib janubdagi Hilmand viloyatida bir odam o'zini portlatib, sakkiz odamni, jumladan deputatlikka nomzod Solih Muhammad Ochiqzoyni halok qilgan.

Parlament saylovlari 20-oktabrga belgilangan. 2565 nomzod 249 ta mandat uchun bellashadi. Nomzodlarning 417 nafari ayollar.

Saylovlar 2015-yilda o'tkazilishi kerak edi, biroq xavfsizlikning qaltisligi va siyosiy tortishuvlar sabab qoldirilgan. Ba'zi kuzatuvchilarga ko'ra, davlat bu yilgi saylovlarga ham tayyor emas, jarayonning yana bir bor qoldirilish ehtlmoli mavjud.

  • 16x9 Image

    Amerika Ovozi

    "Amerika Ovozi" - Vashingtonda asoslangan xalqaro teleradio, 45 tilda efirga chiqadi. O'zbek tilidagi ko'rsatuv va eshittirishlarda nafaqat xalqaro hayot balki siz yashayotgan jamiyatdagi muhim o'zgarishlar va masalalar yoritiladi. O'zbek xizmati AQSh poytaxtida olti kishilik tahririyatga va Markaziy Osiyo bo'ylab jamoatchi muxbirlarga ega.

Facebook Forum

XS
SM
MD
LG