Qochqinlarga har tomondan yordam berilmoqda, ammo kam


Toshkentliklar qochqinlarga yordam qo'lini cho'zishga shoshilmoqda

Xalqaro tashkilotlar, O'zbekiston hukumati, ayrim davlatlar, oddiy fuqarolar, xorijdagi o'zbeklar Qirg'iziston janubidan qochgan odamlarga yordam bermoqda.

Birlashgan Millatlar Tashkiloti ma'lumotlariga ko'ra, Qirg'iziston janubidagi xunrezliklar oqibatida hududni 400 mingga yaqin o'zbeklar tashlab chiqqan. Aksariyati O'zbekistonning Farg'ona vodiysidagi 3 viloyatida tashkil etilgan lagerlarda yashamoqda. Ularga gumanitar yordam ko'rsatish dolzarb muammo bo'lib qolmoqda. Bu ishda mahalliy va xalqaro tashkilotlar hamda fojiaga befarq tura olmagan O'zbekiston fuqarolari faol ishtirok etmoqda.

Qirg'iziston janubidan O'zbekistonga qochqinlar o'ta boshlashi bilan xorijdagi o'zbekistonliklar yordamga shoshildi. AQSh, Rossiya, Janubiy Koreya va boshqa mamlakatlardagi o'zbeklar xayriya to'play boshlashdi. Toshkentga jo'natilgan ushbu pullarga esa qochqinlar uchun eng zarur jihozlar sotib olinib, lagerlarga jo'natilmoqda.

"Amerikadagi vatandoshlardan 2800 dollar pul oldik. Unga ayollar va bolalar uchun gigiyena vositalari, bolalar kiyimi va ovqati hamda suv sotib olib, o'sha kuniyoq Qo'qondagi hamkor tashkilotga yubordik. Biroq bu narsalar 50 oila ehtiyojlarini qondirishga yetdi xolos", - deydi Toshkentdagi jonkuyarlardan biri.

Kechadan boshlab xalqaro tashkilotlar ham O'zbekistonga o'tgan qochqinlarga insonparvarlik yordamini yetkaza boshlagan. Jumladan, Birlashgan Millatlar Tashkiloti ikkita samolyot yuborgan. AQShning Xalqaro tibbiy tashkilotlar (Medical Teams International) guruhi 20 ming qochqinga uch oyga yetadigan 900 ming dollarlik dori-darmon jo'natgan. O'zbekiston hukumati qochqinlarga xayriya uchun hisob raqamlari tashkil etgan. "Sog'lom avlod uchun", Forum va "Sen yolg'iz emassan" jamg'armalari faol ish olib bormoqda.

Bugun Prezident Karimovning qizi Lola Karimova boshchiligidagi "Sen yolg'iz emassan" jamg'armasi tashabbusi bilan Toshkent shahridagi 17-maktabda kuni bilan aholidan qochqinlarga yordam qabul qilingan.

Tashkilot vakilining aytishicha, kutilganidan ko'p xayriya olindi. Bugun-erta yuk qochqinlar lageriga yuboriladi.

O'zbekistonga o'tgan qochqinlar ahvolidan xalqaro tashkilotlar, hukumat va oddiy fuqarolar xabar olar ekan, Qirg'iziston janubida yordam yetib bormagan hali ko'p joylar bor. Xavfsizlik ta'minlanmagani bois o'zbeklar gumanitar yordam tarqatilayotgan punktlarga borishdan hayiqmoqda.

Amerika ovoziga Jaloloboddan yo'llanayotgan xatlarning birida aytilishicha, masalan, kecha Abduvahob Izzatullayev ismli odam insonparvarlik yordamini olish uchun borgan yagona o'zbek bo'lgan, biroq Jalolobod Milliy xavfsizlik xizmati xodimlari tomonidan ushlanib, qiynoqlarga solingan va qo'lidagi oziq-ovqat mahsulotlari tortib olingan.

AQShning Virjiniya shtatida o'qiydigan qirg'izistonlik Feruza Hoshimovaning aytishicha, uning oilasi Jalolobodda hamon qamalda.

"Yosh bolalar bilan yerto'lada yashirinib o'tirishibdi. Oziq-ovqat qolmagan, quruq non-suvda", - deydi u.

  • 16x9 Image

    Odil Ruzaliev

    Odil O'zbek xizmatiga 2005-yilda kelgan. Diktor va prodyuser. AQShning Tafts Universitetida (Tufts University) xalqaro aloqalar sohasida magistrlik darajasini olgan. Ungacha O'zbekiston TV 1-kanalida ingliz tilidagi yangiliklar – FCN (First Channel News) – ko'rsatuvining muallif-boshlovchisi edi. "Axborot" dasturida mehnat qilgan. Odil ko'p yillar AQShning Toshkentdagi elchixonasi axborot bo'limida ishlagan. O'zbek, ingliz va rus tillarida chop etilgan qator maqolalar muallifi. Farg'ona shahrida tug'ilgan.

    Odil Ruzaliev is a reporter, radio and TV anchor, web editor and producer for Voice of America’s Uzbek Service since 2005. Prior to joining VOA, he worked at the State Radio and TV of Uzbekistan, BBC International’s Central Asia region, and was a regular Contributor for CNN World Report. He has also worked as an Information Assistant at the US Embassy in Tashkent, Uzbekistan. He was the creator and host of the TV program First Channel News, Uzbekistan’s first English language news broadcast. In his spare time he is a freelance photographer. A native of Ferghana Valley, Uzbekistan, Odil graduated from the Uzbekistan State World Languages University. In addition, he was an exchange student at Pace University in New York City and holds a master’s degree in international affairs from the Fletcher School of Law and Diplomacy at Tufts University in Medford, Massachusetts.

XS
SM
MD
LG