Breaking News

Rossiyada ikki yil ishlagan AQSh elchisi iste'fo berdi


Jon Xantsmen

AQShning Rossiyadagi elchisi Jon Xantsmen ikki yillik faoliyatidan so’ng iste’fosini e’lon qildi. Uning aytishicha, bu davr ikki mamlakat munosabatlari uchun og’ir kechdi.

Jon Xantsmenning nomzodi ikki yil oldin Senatda ko’rilayotganida u bo’lajak ishining murakkab bo’lishini tan olgan edi.

“Rossiya Federatsiyasida AQSh elchisi bo’lib ishlash oson bo’lmasligini yaxshi tushunaman”, - degan edi u.

Xantsmen AQSh Rossiyani 2016-yil prezident saylovlariga aralashganlikda ayblab, bu ishni tergov qilayotgan bir paytda ishladi.

Vashingtondagi “Atlantika kengashi” tahlil markazi eksperti Mark Simakovskiyning aytishicha, bunday vaziyatda elchiga o’z vazifalarini bajarish oson emas.

“AQSh-Rossiya munosabatlari ko’p jihatdan bu masalaning Vashingtondagi qizg’in muhokamalari va Kongressdagi har ikki partiya vakillarining Moskva bilan aloqa va muloqotni cheklash talablari bois to’xtab qoldi”, - deydi u.

Xantsmen iste’fo arizasida Rossiyaning AQSh yoki ittifoqchilariga qarshi harakatlariga javob berish kerakligini ta’kidladi.

Elchi oktabrda Moskvani tark etishi kutilmoqda. Ayrim xabarlarga ko’ra, 2009-yilgacha Yuta shtatida to’rt yil gubernatorlik qilgan siyosatchi yana bir muddatga saylanish ustida o’ylanmoqda.

  • 16x9 Image

    Amerika Ovozi

    "Amerika Ovozi" - Vashingtonda asoslangan xalqaro teleradio, 45 tilda efirga chiqadi. O'zbek tilidagi ko'rsatuv va eshittirishlarda nafaqat xalqaro hayot balki siz yashayotgan jamiyatdagi muhim o'zgarishlar va masalalar yoritiladi. O'zbek xizmati AQSh poytaxtida olti kishilik tahririyatga va Markaziy Osiyo bo'ylab jamoatchi muxbirlarga ega.

Facebook Forum

XS
SM
MD
LG