Breaking News
Din

Indoneziyalik musulmon va nasroniylar Amerikada totuvlikka intilmoqda


Indoneziyalik musulmonlar

Amerikani “qaynar qozon” deydilar. Unda nafaqat turli millat va elat vakillari, balki turli din vakillari ham tinchlik va totuvlikda yashashga intiladi. Filadelfiya shahrida yashovchi indoneziyalik-amerikalik nasroniylar va musulmonlar bu borada boshqalarga o’rnak ko’rsatishga harakat qilyapti.

Indoneziyalik musulmon va nasroniylar Amerikada totuvlikka intilmoqda
Iltimos, kuting...

No media source currently available

0:00 0:02:57 0:00

Indoneziyada 270 million aholining salkam 11 foizini nasroniylar tashkil etsa, AQShda musulmonlar undan-da kamroq – aholining atigi 1 foizi. Bu mamlakatda diniy ko’pchilikka mansub indoneziyalik nasroniylar ozchilikdagi musulmon vatandoshlariga yordam qo’lini cho’zdi.

“Ozchilik vakili bo’lish oson emas. Indoneziyada boshimdan o’tgan bu”, - deydi Filadelfiyadagi nasroniy markazidan ruhoniy Aldo Siaxaan.

2007-yilda ochilgan markaz o’sha paytda hali o’z masjidiga ega bo’lmagan indoneziyalik musulmonlarga ibodat uchun joy ajratdi.

"Ramazon oyi edi. Taroveh namozlarini o’qishga joyimiz yo’q edi”, - deydi Indah Nuritasari ismli bir musulmon ayol.

“Barcha musulmon do’stlarimizni bu yerga da’vat etdik. Ular oyoq kiyimlarini yechib, zinaga qo’yishdi. Quyi qavatda birga iftorlik qilardik”, - deydi ruhoniy.

Filadelfiyada 7 mingga yaqin indoneziyalik yashaydi, aksariyati nasroniy. Ular Indoneziyada 1998-yilgi etnik to’qnashuvlar ketidan AQShga kelgan.

"Amerikada magistraturada o’qiganimda o’zimdan boshqa birorta indoneziyalikni ko’rmagan edim. 2007-yil oxirida Filadelfiyaga ko’chib kelganimda esa minglab vatandoshlarni uchratdim”, - deydi nasroniy Lindi Bakus.

Ramazon oyida musulmonlarga cherkovda ibodat qilishga imkon berilgani bilan yirik xoch va Bibi Maryamning haykali ko’plarni noqulay ahvolga solib qo’ydi.

"Taroveh namozlarida xochning ustini yopib qo’yardik”, - deydi Aditya Setyavan.

Bu hol ayrim nasroniylarga yoqmadi.

“Indoneziyalik nasroniylar va amerikalik nasroniylar mening bu qarorimni olqishlamadi”, - deydi ruhoniy Siaxaan.

2008-yilda indoneziyalik-amerikalik musulmonlar o’z masjidiga asos soldi. Bundan bir yil oldingi yaxshilik evaziga ular har yili Ramazonda nasroniy vatandoshlarini “Al-Falah” masjididagi iftorga da’vat etadi.

“Biz ularga “hayit muborak” deymiz, ular esa bizni Rojdestvo bilan tabriklashadi. Indoneziyada buni olqishlashmasligini yaxshi bilaman, ammo bu yerda biz bir-birimizni hurmat qilamiz”, - deydi Bakus.

AQShning xalqaro diniy erkinliklarga bag’ishlangan yillik hisobotida Indoneziyada diniy ozchilikdagi guruhlarga nisbatan muomala ko’p tanqidga olinadi. Biroq Filadelfiyada nasroniylar va musulmonlar uyg’unlikda yashamoqda.

  • 16x9 Image

    Amerika Ovozi

    "Amerika Ovozi" - Vashingtonda asoslangan xalqaro teleradio, 45 tilda efirga chiqadi. O'zbek tilidagi ko'rsatuv va eshittirishlarda nafaqat xalqaro hayot balki siz yashayotgan jamiyatdagi muhim o'zgarishlar va masalalar yoritiladi. O'zbek xizmati AQSh poytaxtida olti kishilik tahririyatga va Markaziy Osiyo bo'ylab jamoatchi muxbirlarga ega.

Facebook Forum

XS
SM
MD
LG