Breaking News

Isroillik saylovchilar 2 yilda 4-saylovda qatnashadi


Isroil Bosh vaziri Benyamin Netanyaxu

23-mart kuni isroillik saylovchilar so’nggi 2 yilda to’rtinchi saylovda ovoz beradi. Bosh vazir Benyamin Netanyaxu koronavirusga qarshi vaksinaning aholiga taklif etilishi unga saylovda g’alaba keltirishiga umid qilmoqda. Ammo shu bilan birga, iqtisodiyotning pandemiyadan zarar ko’rgani pand berishi ham mumkin.

Xalqaro hayot – 22-mart, 2021-yil
Iltimos, kuting...

No media source currently available

0:00 0:11:28 0:00

Korrupsiya va firibgarlik bilan bog’liq ayblovlarga yuz tutayotgan 71 yashar siyosatchi ustidan sud jarayoni aprel oyida davom etishi rejalangan.

Netanyaxu 2020-yilda Sudan va ayrim arab mamlakatlari bilan diplomatik aloqalarning o’rnatilganini shaxsiy yutug’i sifatida ko’rarkan, hokimiyat tepasida qolsa, mintaqadagi yana bir necha davlat Isroilni tan olishini aytmoqda.

Isroil saylovlarida hali biror partiya ko’pchilik ovozlarni qo’lga kiritib, yakka hokim bo’lmagan. Bu safar ham Netanyaxu va uning “Likud” partiyasi boshqa partiyalar bilan koalitsion hukumat tuzishga umid qilmoqda.

Oldingi saylovlarda Netanyaxu, asosan, so’l siyosatchilar qarshiligiga uchragan bo’lsa, bu gal o’ng qarashlarga ega nomzodlar ham unga muammo tug’dirishi mumkin.

Ulardan biri 57 yashar sobiq moliya vaziri va teleboshlovchi Yair Lapid bo’lsa, ikkinchisi Netanyaxuning so’nggi hukumatdagi hamkori 61 yashar sobiq general Benni Gansdir.

So’nggi saylovdan keyin Gansning “Ko’k va oq” partiyasi Netanyaxu bilan koalitsion hukumatga kirgani partiyaning ko’plab tarafdorlarini g’azabga soldi, ijtimoiy so’rovlarda Gans reytingi tushib ketdi.

Bosh vazirlikka yana bir nomzod 54 yashar sobiq vazir Gideon Saar bo’lib, u Netanyaxuning “Likud” partiyasidan chiqib, “Yangi Umid” partiyasiga asos soldi. Netanyaxudan yanada konservativ qarashlari bilan tanilgan siyosatchi Falastin davlatchiligiga qarshi, G’arbiy Sohilni Isroilga to’liq qo’shib olishni istaydi.

Yana bir nomzod Naftali Bennet ham Netanyaxu doirasidan chiqqan. Yuqori texnologiyalar sohasida millioner 48 yoshda. “Yamina” partiyasini boshqarmoqda. Gideon Saar bilan birlashib, hokimiyatni qo’lga olmoqchi.

Ommaviy so’rovlar bo’lajak g’olibni aniqlashda ojizlik qilmoqda. “Likud” partiyasi 120 a’zolik Knessetda yana eng katta fraksiya bo’lishi bashorat qilinmoqda, ammo qaysi guruhlar bilan ittifoq Netanyaxuni bosh vazirlikka qaytarishi hozircha aniq emas.

  • 16x9 Image

    Amerika Ovozi

    "Amerika Ovozi" - Vashingtonda asoslangan xalqaro teleradio, 45 tilda efirga chiqadi. O'zbek tilidagi ko'rsatuv va eshittirishlarda nafaqat xalqaro hayot balki siz yashayotgan jamiyatdagi muhim o'zgarishlar va masalalar yoritiladi. O'zbek xizmati AQSh poytaxtida olti kishilik tahririyatga va Markaziy Osiyo bo'ylab jamoatchi muxbirlarga ega.

Facebook Forum

XS
SM
MD
LG