Breaking News

Shavkat Mirziyoyevning jamoatchilik oldidagi chiqishlari ko'paydi


O'zbekistonning muvaqqat prezidenti Shavkat Mirziyoyev
O'zbekistonning muvaqqat prezidenti Shavkat Mirziyoyev

O`zbekiston Markaziy saylov komissiyasi xalqaro tashkilotlarni prezidentlik saylovlarini kuzatish uchun O'zbekistonga taklif qilishda davom etmoqda. Komissiya, jumladan, ShHT, MDH, YXHT kabi tashkilotlarga shunday taklif yuborgan. O`zbekistonning yangi prezidentiga 4-dekabr kuni ovoz beriladi. Prezidentlikka da'vogar partiyalar nomzodlari e`lon qilib bo`lindi, ammo saylovda jiddiy raqobat bo'lishi kutilmaydi.

Qonunchilikka ko`ra, prezidentlikka nomzod ko`rsatish uchun boshqa imkoniyat yo`q. Saylovdagi asosiy nomzod Shavkat Mirziyoyevga raqobat qiluvchilar u boshliq hukumatni qo`llab-quvvatlab kelayotgan siyosatchilardan iborat.

O`zbekistonda prezidentlik saylov kampaniyasi 8-sentabrdan boshlandi. Mamlakatdagi mavjud to`rtta rasmiy partiya o`z nomzodlarini e`lon qilgan, ayni paytda ular saylovda qatnashish, nomzodlarni rasman ro`yxatdan o`tkazishga doir hujjatlarni Markaziy saylov komissiyasiga topshirmoqda. Markaziy saylov komissiyasi prezidentlik saylovlari ochiq, adolatli o`tishini bildirgan, bu jarayonni kuzatishga xalqaro tashkilotlar taklif qilingan.

O`zbekistondagi prezidentlik saylovlarini doimiy ravishda kuzatib kelayotgan YXHTning Demokratik institutlar va inson huquqlari bo`yicha byurosi ayni paytda Varshavada inson huquqlariga oid vaziyat yuzasidan yig`ilish o`tkazmoqda. Yig`ilishda O`zbekistondagi vaziyat ham muhokamada, unda o`zbekistonlik huquq himoyachilari ham qatnashmoqda.

O`zbekiston inson huquqlari tashabbus guruhi raisi Surat Ikromov YXHTning inson huquqlariga oid yig`ilishida qatnashayotgani yo`q. Uning aytishicha, bunga sabab YXHTning ro`yxatdan o`tmagan inson huquqlari tashkilotlari bilan ishlamasligidir.

Surat Ikromov Shavkat Mirziyoyevni saylovlardagi so`zsiz g`olib deb hisoblaydi. Bu nafaqat uning ayni paytda muvaqqat prezident vazifasini bajarayotgani, balki raqiblik qilayotgan nomzodlarning ham Mirziyoyev g`alabasiga shubhalanmasligi bilan bog`liq.

“Partiyalardan ko`rsatilayotgan nomzodlarni hech kim tanimaydi, ularni saylovda rostdan qatnashayotganiga, raqibligiga ham hech kim ishonmaydi. Mirziyoyevning uzoq yillardan buyon hukumatda ishlab kelayotgani ko`pchilikka ma`lum. Xullas, saylov odatdagidek o`tadi, Mirziyoyev 80 foizdan oshiq ovoz bilan g`alaba qiladi”, - deydi Ikromov.

Toshkentlik sharhlovchi Anvar Nazirga ko`ra, muvaqqat prezidentdagi bu yaqqol ustunlik ham saylovning haqiqatda demokratik ruhda o`tishini kafolatlamaydi.

“Bunga qaramasdan, prezidentlik saylovlari ochiq o`tmaydi, bundan tashqari, saylovda hech qanday raqobat, musobaqa bo`lishi haqida ham gap bo`lishi mumkin emas, har holda hozircha shunday. Odamlarga kelsak, hozir hech kim saylovga qiziqish bildirayotgani yo`q, bu kuzatilmaydi ham. Faqat kutish bor, o`zgarishlar qaysi tomonga bo`ladi, ijobiymi, salbiymi”, - deydi Anvar Nazir.

Muvaqqat prezident, prezidentlik saylovlaridagi asosiy nomzod Shavkat Mirziyoyev 8-sentabrdan beri davlat rahbari lavozimini bajarib kelmoqda. Dastlabki kunlardanoq kadrlar sohasida jiddiy o`zgarishlar qilishga kirishdi. Jizzax va Toshkent viloyatlariga safar uyushtirdi. Angrenda bo`lgan Mirziyoyev Toshkent viloyatiga bir milliard dollarga yaqin sarmoya yotqizilishini e`lon qildi, poytaxtda esa ancha yillardan buyon qurilishi to`xtab qolgan Yunusoboddagi metro yo`nalishini yakunlashga ko`rsatma berdi.

Anvar Nazir hozircha Mirziyoyevning faoliyati, xususan, uning keyingi siyosati qanday bo`lishi haqida gapirishga erta ekanligini aytadi.

“Bu haqda hozir bir narsa deyish qiyin, asosiy faoliyat prezident bo`lganidan so`ng boshlanadi. Hozirgi harakatlar ko`proq saylov oldi jarayonlari, uchrashuvlari bilan bog`liq. Mamlakat siyosatidagi o`zgarishlar haqida esa faqat Mirziyoyevning g'alabasi, prezidentlikni boshlaganidan so`ng jiddiy gapirish mumkin. Hozircha hammasi saylov bilan bog`liq jarayonlar ”, - deydi u.

Surat Ikromov fikricha, Shavkat Mirziyoyevning viloyatlarda uchrasuvlar o`tkazgani, kadrlar masalasida jiddiy o`zgarishlar qilayotgani ijobiy taassurotlar uyg`otmoqda, ammo inson huquqlari bilan bog'liq masalada o`zgarish yo'q.

“Majburiy mehnat masalasi, aksincha, yanada yomonlashdi. Paxta terimiga borishdan bosh tortgan tadbirkorlar, fuqarolardan yig`ilayotgan mablag` miqdori oshgan, hamma majburan paxtaga safarbar qilinmoqda”, - deydi Ikromov.

Muvaqqat prezident va Bosh vazir Shavkat Mirziyoyevga prezidentlik saylovida “Adolat” partiyasidan Narimon Umarov, O`zbekiston Xalq demokratik partiyasidan Hotamjon Ketmonov va “Milliy tiklanish” partiyasidan Sarvar Otamurodov raqiblik qilishi kutilyapti. Markaziy Saylov komissiyasi prezidentlikka nomzodlarni 30-sentabrdan rasman ro`yxatga olishni boshlaydi.

  • 16x9 Image

    Amerika Ovozi

    "Amerika Ovozi" - Vashingtonda asoslangan xalqaro teleradio, 45 tilda efirga chiqadi. O'zbek tilidagi ko'rsatuv va eshittirishlarda nafaqat xalqaro hayot balki siz yashayotgan jamiyatdagi muhim o'zgarishlar va masalalar yoritiladi. O'zbek xizmati AQSh poytaxtida olti kishilik tahririyatga va Markaziy Osiyo bo'ylab jamoatchi muxbirlarga ega.

XS
SM
MD
LG