Shvetsiyadagi terror xuruji ham o'zbek muhojir ishimi?

  • Amerika Ovozi

Stokgolm, 7-aprel, 2017

7-aprel kuni Shvetsiya poytaxti Stokgolmda yuk mashinasida odamlarni yoppasiga bosib, to'rt kishini o'ldirgan shaxs 39 yoshli o'zbekistonlik, to'rt bolaning otasi, deya gumon qilinmoqda. Lekin ism-sharifi mavhum. Shved tilidagi "Aftonbladet" axborot manbaiga ko'ra, ijtimoiy tarmoqlarda "Islomiy davlat" ni targ'ib qilib kelgan bu kishi hozirda hibsda. Politsiya bir necha odamni qo'lga olgan, ammo aniq ma'lumotlar mavjud emas. 15 kishi jarohatlangan. Gavjum savdo markazini nishonga olgan haydovchi qochib ketgan. Qidiruv davom etmoqda.

Bosh vazir Stefan Lofven so'zi bilan aytganda, bu voqea qonli terrorizmdir. Hujum sodir etilgan joyga borib, vaziyatni ko'zdan kechirgan Lofven deydiki, maqsad - demokratiyaga zarar keltirish, biroq bunga hech kim erisha olmaydi. Mamlakat va tuzum mustahkam, deydi u, bunday hujumlar bilan Shvetsiya xalqini qo'rqita olmaysiz. Dam olish kunlari motam e'lon qilingan.

Bu kabi xurujlar yaqin o'tmishda Yevropa bo'ylab bir necha shaharlarda ro'y berdi, xususan Fransiya, Britaniya va Germaniyada.

"Islomiy davlat"ga sodiq odamlar ular ortida turganlikda ayblandi, ayrim hollarda terror guruhi buni tan oldi.

Shvetsiya Bosh vaziri Stefan Lofven terror xuruji qilingan joyda, Stokgolm, 7-aprel, 2017
Shvetsiya Bosh vaziri Stefan Lofven terror xuruji qilingan joyda, Stokgolm, 7-aprel, 2017

Yevropa Ittifoqi: Shvetsiyaga hujum butun blokka hujum

Hozircha Stokgolmdagi voqea aynan kimning ishi ekani noma'lum. Shvetsiya qiroli Karl Gustaf xalqni bardam va bag'rikeng bo'lishga undab, o'lganlarning yaqinlariga hamdardlik bildirgan.

Yevropa Ittifoqi Komissiyasi rahbari Jan-Klod Yunker:

“Yevropaning eng ko'rkam, gavjum va tinib tinchimas shahri yovuzlik bilan yuzlashdi. Yevropa Ittifoqining bir davlatiga qilingan hujum hammamizga nisbatan hujumdir".

Germaniya rahbari Angela Merkel ham shunday fikrda.

Fransiyada Prezident Fransua Olland Stokgolmdagi voqeani dahshat va g'azab mahsuli, deya baholagan. Parijda o'lganlar ruhi uchun sukunat saqlangan.

Qo'shni Finlandiya rahbari Sauli Niinisto fikricha ham bu xuruj terrorizmdir. Daniya Bosh vaziri Lars Loekke Rasmussen esa qo'rqoqlarning ishi deb, Skandinav jamiyatlari osuda va farovon hayot kechirishda davom etadi, deya ta'kidlagan.

AQSh Davlat departamenti Shvetsiya xalqiga hamdard ekanini bayon etib, terrorizmga qarshi kurashni kuchaytirishga, xalqaro hamjamiyatni birga harakat qilishga chaqirgan.

  • 16x9 Image

    Amerika Ovozi

    "Amerika Ovozi" - Vashingtonda asoslangan xalqaro teleradio, 45 tilda efirga chiqadi. O'zbek tilidagi ko'rsatuv va eshittirishlarda nafaqat xalqaro hayot balki siz yashayotgan jamiyatdagi muhim o'zgarishlar va masalalar yoritiladi. O'zbek xizmati AQSh poytaxtida olti kishilik tahririyatga va Markaziy Osiyo bo'ylab jamoatchi muxbirlarga ega.

XS
SM
MD
LG