Bayden ma’muriyati Afg’onistonni tark etmoqchi bo’lgan barcha amerikaliklar xavfsiz evakuatsiya qilinishini bildirmoqda. Qo’shma Shtatlar tijoriy aviakompaniyalarga bu ishda yordam berishni buyurdi.
Your browser doesn’t support HTML5
Xalqaro hayot – 23-avgust, 2021-yil
Amerikaliklar bilan birga urushda AQSh harbiylariga yordam bergan, Amerika moliyalagan loyihalarda va tashkilotlarda ishlagan afg’onlar ham mamlakatdan chiqishga harakat qilyapti.
“Vatanga qaytmoqchi bo’lgan har bir amerikalikda shunday imkoniyat bo’ladi. NATOga a’zo ittifoqchi davlatlar fuqarolarini ham evakuatsiya qilyapmiz”, - dedi Prezident Jo Bayden.
Germaniya askarlari odamlarni poytaxt atrofidagi hududlardan vertolyotlarda Kobul xalqaro aeroportiga yetkazmoqda.
AQShning respublikachi senatori Joni Ernstning aytishicha, Bayden Amerika hamkorlarini evakuatsiya ishlariga jalb qilishda sustkashlik qildi.
“Mana shunga kelganda Prezident Bayden qovun tushirdi. Bu ishni ittifoqchilar bilan eng boshidan hamkorlikda qilganimizda ancha oson bo’lardi bizga”, - deydi qonunchi.
Davlat kotibi Entoni Blinkenning aytishicha, Afg’onistondagi so’nggi voqealar ittifoqchilarga ruhan qiyin keldi.
Xabarlarga ko’ra, Germaniyaga uchayotgan samolyotda homilador afg’on ayol qiz tug’di.
AQSh Mudofaa vaziri Lloyd Ostinning aytishicha, Bayden qo’lidagi razvedka ma’lumotlariga asoslanib, qo’ldan kelgancha harakat qildi.
“Prezident biz unga berayotgan ma’lumotlarga e’tibor berdi. Qattiq va o’ylangan jarayonga qo’l urdi va men uning qarorini qo’llab-quvvatlayman”, - dedi vazir.
Blinkenga ko'ra, so’nggi 24 soatda taxminan 8000 odam evakuatsiya qilindi.