Xalqaro jinoiy sud Venesuelada Prezident Nikolas Maduro hukumatining insoniyatga qarshi jinoyatlarga qo’l urgani haqidagi da’volarni tergov qilishga rasman kirishmoqda.
Your browser doesn’t support HTML5
Xalqaro hayot – 4-noyabr, 2021-yil
Bu haqda poytaxt Karakasga uch kunga safar qilgan sud bosh prokurori Karim Xon e’lon qildi. U Maduro bilan uchrashib, anglashma memorandumini imzoladi.
Gaagada joylashgan BMT qoshidagi sud 2017-yilda bir necha oy Venesuelada davom etgan norozilik namoyishlari va xavfsizlik kuchlarining namoyishlarga munosabati ketidan berilgan da’volarni ko’rib chiqadi.
“Venesueladagi “ajralish chiziqlari” va “geosiyosiy bo’linishlar”dan xabardorman. Biz siyosiy tashkilot emasmiz. Biz qonuniylik va qonun ustuvorligi tamoyillari asosida ish olib boramiz. Idoramga ishimizni bajarishimiz uchun imkoniyat berilishini so’rayman”, - dedi Karim Xon.
Maduro tergovni boshlash qaroriga qo’shilmasligini aytsa-da, haqiqat va adolat qaror topishi uchun samarali hamkorlikni ta’minlashga so’z berdi.
2017-yil namoyishlari Oliy sudning davlat rahbari vakolatlarini kengaytirishi va o’sha paytda muxolifat nazoratidagi parlament vazifalarini cheklashi ketidan yuz bergan. O’shanda 120 dan ortiq odam o’lgan, minglab fuqaro jarohat olgan.
Hukumatni jinoyatlarda ayblayotgan o’nlab venesuelaliklar Karim Xon diqqatini o’ziga tortish maqsadida bugun namoyish qildi.
“Farzandlaridan ayrilgan onalarmiz. Karim Xon dardimizga quloq soladi degan maqsadda chiqdik”, - dedi ulardan biri.
Shu kungacha asosan Afrikadagi davlatlarda insoniyatga qarshi jinoyatlar bilan bog’liq da’volarni ko’rgan sud uchun Venesuela Lotin Amerikasida tergovga yuz tutayotgan ilk mamlakatdir.