Xalqaro chaqiriqlarga qaramasdan, Eronda 26 yoshli ayol dorga osildi. Rayhona Jabboriy Razvedka vazirligining sobiq xodimi Murtazo Abdulali Sarbandiyni o'ldirgani uchun 2007-yilda hibsga olingan va sudlangan edi.
Tergov jarayonida Jabboriy bu shaxs uni zo'rlashga uringanini aytgan.
Oliy jazo haqidagi hukm ado etilgani haqida Eron axborot agentliklari xabar berdi. Jabboriyning onasiga kecha qizini qamoqxonada so'nggi bor ko'rishga ruxsat berilgan.
Xalqaro Amnistiya va boshqa huquq tashkilotlariga ko'ra, qotillik yuzasidan tergov jarayoni xolis olib borilmagan va ko'plab savollar javobsiz qolgan. Ayol dorga osilganini faollar fojia deya atadi.
Rayhona Jabboriyning ishi bir necha bor qoldirilgan. Sud qarorida yozilishicha, Sarbandiyning oila a'zolari ayolni avf etishga ko'nmagani va moliyaviy kompensatsiyadan voz kechgani uchun hukm ijro etildi.
Huquq faollari Tehrondan Jabboriyning ishini qayta ko'rib chiqish va uni ozod etishni so'rab, qariyb chorak million imzo to'plagan edi.