Vashingtonda ayollar marshi
Poytaxt Vashingtonda, Prezident Donald Tramp inauguratsiyasidan bir kun o'tib ayollar namoyishi bo'lib o'tmoqda. AQShning turli hududlaridan kelgan minglab ayollar, huquq faollari va nodavlat tashkilotlar vakillari poyaxt ko'chalarini to'ldirdi. Ular soni 100 mingdan oshishi kutilyapti.
Xotin-qizlar AQSh ko'chalarida namoyish qildi
Inauguratsiya paradi
Prezident Donald Tramp va Vitse-prezident Mayk Pens Kapitoliy binosi oldiga chiqib, askarlar yurishini tomosha qildi. Shundan so'ng Tramp rafiqasi bilan prezident mashinasiga chiqib, Oq uy sari yo'lga chiqdi. Ko'chaning har ikki tomonida odamlar qo'llarini ko'tarib, Amerikaning yangi rahbarini olqishladi.
Politsiyachilar va xavfsizlik xodimlari odamlar oldini to'sib olgan. Ular soni har qachongidan ham ko'p.
Oq uy oldida AQShning yangi rahbari uchun parad uyushtirildi. Prezident, vitse-prezident va ularning oila a'zolari, yaqinlari o'tirgan sahna oldidan harbiylar, AQShning turli xavfsizlik va davlat idoralari vakillari, jamiyatning turli jabhalarida ishlovchi va faoliyat yurituvchi amerikaliklar, yoshlar guruhlari yurib o'tdi.
Prezident Tramp va uning rafiqasi bugun uchta rasmiy ziyofat kechasida qatnashishi belgilangan.
Tramp prezident sifatida dastlabki farmonlarga imzo chekdi
Prezident Donald Tramp qasamyod keltirishi bilan Kapitoliy binosining o'zida bir qator hujjatlarga imzo chekdi. U vazirliklar uchun tavsiya qilgan o'z nomzodlarini imzo orqali rasman Senatga taqdim etdi. Shuningdek, Mudofaa vazirligiga nomzodi ko'rsatilgan Jeyms Mattisni ushbu lavozim uchun qo'yilgan talabdan ozod qilish haqidagi farmonga ham imzo chekdi.
Qoidaga ko'ra, Pentagonga harbiy odam rahbarlik qilishi mumkin emas. Mattis harbiy xizmatdan faqat uch yil oldin iste'foga chiqqan edi.
Sobiq rahbar Barak Obama va uning rafiqasi Mishel xalq bilan xayrlashib, maxsus vertolyotda Vashingtonni tark etmoqda.
Sobiq Vitse-prezident Jo Bayden va uning turmush o'rtog'i Jill "Amtrak" poyezdida uyiga, Delaverga jo'nab ketayapti.