Afg’oniston poytaxti Kobulda hazoralar yetakchisi Abdul Ali Mozoriy xotirasiga bag’ishlangan rasmiy anjuman nishonga olindi. Unda bir necha afg’on siyosiy rahbarlari ishtirok etayotgan edi.
Tadbirda Afg’oniston hukumati raisi Abdulla Abdulla, Sobiq Prezident Hamid Karzay, sobiq vitse-prezident Muhammad Yunus Qonuniy, prezidentlikka nomzod Hanif Atmar, bosh vazir o’rinbosari Muhammad Muhaqqiq, tashqi ishlar vaziri Salohiddin Rabboniylar bo’lgan.
Minglab odam qatnashgan ushbu yig’in raketa hujumiga uchradi.
Ichki ishlar vazirligi hujumda uch nafar odam o’lgani, yana 22 kishi yaralanganini tasdiqladi. Yaralanganlar orasida prezidentlikka nomzod Abdul Latif Pidrom ham bor.
Prezidentlikka nomzod Hanif Atmarning 8 nafar qo’riqchisi ham tan jarohati olgan.
Ichki ishlar vazirligi jinoyat ishiga aloqador bir nafar shaxs ushlangani va raketa otilgan bino qurshovga olinganini ma’lum qildi.
“Bunday anjumanlarni nishonga olish madaniy va demokratik qadriyatlarga qarshi jinoyatdir”,- deyiladi prezident bayonotida.
Abdul Ali Mozoriyni xotilash marosimi har yili o’tkaziladi. Unda Kobul g’arbida yashovchi hazoralar keng ko’lamda qatnashadi. Bundan avval ham hazoralar uyushtirgan yig’ilishlar nishonga olingan edi.
Ali Mozoriy bundan 24 yil avval Tolibon guruhi tomonidan o’ldirilgan.
Hujum uchun javobgarlikni “Islomiy davlat” o’z zimmasiga olgan.
Facebook Forum